(ශාන්ත චන්ද්‍රසිරි)

නුවරඑළිය, හෝර්ටන්තැන්න වනෝද්‍යානයේ කෘමි සතුන් අල්ලාගෙන මෙරටින් රැගෙන යාමට තැත් කිරීම ඇතුළු චෝදනා 80 ක් සඳහා නිවරදිකරුවන් බව පැවසූ විදේශිකයන් දෙදෙනෙකු අප්‍රේල් මස 09 දින දක්වා රක්ෂිත බන්ධනාගාර ගතකරන ලෙස නුවරඑළිය මහේස්ත්‍රාත් පමෝද ජයසේකර මහතා අද (28) නියෝග කළේය.

හූවෙයි සහ යුවාන් ලින්ෆෙන් යන චීන ජාතිකයන් දෙදෙනා මෙසේ රක්ෂිත බන්ධනාගාර ගත කෙරිණි.
 
ඉකුත් පෙබරවාරි මස 18 දින මෙම චීන ජාතිකයන් දෙදෙනා හෝර්ටන්තැන්න රක්ෂිත වනෝද්‍යානයේ අධි සංවේදි පේරක කලාපය තුළදී මෙරටට ආවේණික කෘමි සතුන් අල්ලාගෙන රසායනික ද්‍රාවණයක බහාලා මෙරටින් රැගෙන යාමට තැත් කොට සිටියදි වනෝද්‍යාන නිලධාරීන් විසින් ඔවුන් අත්අඩංගුවට ගෙන තිබිණි.
 
අත්අඩංගුවට ගත් එම චීන ජාතිකයන් දෙදෙනා අවස්ථා දෙකකදී නුවරඑළිය මහේස්ත්‍රාත්වරයා විසින් රක්ෂිත බන්ධනාගාර ගත කරන ලද අතර පසුව ඔවුන් දෙදෙනා ඇප මත මුදා හැර තිබිණි.
 
මෙම නඩුව අද (28) දින කැදවු අවස්ථාවේ හෝර්ටන්තැන්න වනෝද්‍යානයේ නිලධාරීන් විසින් චීන ජාතිකයන් දෙදෙනාට එරෙහිව චෝදනාවන් 80 ක් ගොනු කර ඉදිරිපත් කොට තිබු අතර එම චෝදනාවන්ට නිවරදිකරුවන් බව ඔවුන් පවසන ලදි.

අප්‍රේල් මස 09 දින සිට මෙම නඩුව  විභාගයට ගැනීමටත් එතෙක්  චීන ජාතිකයන් දෙදෙනා රක්ෂිත බන්ධානාගාර ගත කරන ලෙස නුවරඑළිය මහේස්ත්‍රාත්වරයා මෙහෙදී නියෝග කළේය.  චීන ජාතිකයන් දෙදෙනා වෙනුවෙන් නීතිඥ සංජීව කෞශල්‍ය ඩයස් මහතා පෙනී සිටියේය.

හෝර්ටන්තැන්න වනෝද්‍යානය භාරකරු ප්‍රදීප් කුමාර  හා නියෝජ්‍ය භාරකරු ටී. පී. දයාරත්න යන නිලධාරී මහත්වරුන් මෙම නඩුව ගොනු කොට අධිකරණයට කරුණු දක්වමින් පෙනී සිටියහ.