(සමන් පාලිත නානායක්කාර)

නාය යාමේ අවදානම නිසා බදුල්ල දිස්ත්‍රික්කයේ කඳවුරු කිහිපයක සිටි පුද්ගලයින් ජාතික ගොඩනැගිලි පර්යේෂණ ආයතනයේ නිර්දේශ මත විසුරුවා හැරිය ද වැසි වැඩි වී  නායයාම්  සක්‍රීය වන්නේ නම් අවධානයෙන් සිට නැවත කඳවුරු ගත විය යුතු බව  බදුල්ල ආපදා කළමනාකරණ මධ්‍යස්ථානය ජනතාවට දැනුම් දෙයි. 

මේ වන විට දිස්ත්‍රික්කයේ පවතින තද වැසි තත්ත්වය නාය යාම්  සඳහා බලපෑ හැකි බැවින් නායයාමේ අවදානම් කලාපවල සිටින ජනතාව දැඩි විමසිල්ලෙන් සිටිය යුතු බව බදුල්ල ආපදා කළමනාකරණ මධ්‍යස්ථානය පවසයි.

මේ වන විට  බදුල්ල දිස්ත්‍රික්කයේ පවුල් 69 ක පුද්ගලයින් 250 දෙනෙකු සුරක්ෂිත මධ්‍යස්ථාවල රඳවා තිබේ.

කඳු බෑවුම්වල ජීවත්වන්නන් අවධානයෙන් සිටිය යුතු බවත් කඳුකර මාර්ගය භාවිතා කරන රියදුරන් දැඩි විමසිල්ලෙන් පසුවිය යුතු බවත්  බදුල්ල  ආපදා කළමනාකරණ මධ්‍යස්ථානයේ සහකාර අධ්‍යක්ෂක ඊ. එම්. එල්. උදයකුමාර මහතා රියදුරන්ට දන්වයි.