කාන්තාවන්ගේ ගෙල බැඳි රන් මාලය කැඩූ හමුදා සෙබලෙකු අත්අඩංගුවට

(එස් .ඩි. කොඩිකාර )
 
කාන්තාවකගේ ගෙල බැඳි රන් මාලය යතුරුපැදියකින් පැමිණ කොල්ල කා පලා ගිය යුද හමුදා සෙබලෙකු  සී.සී.ටී.වී  දර්ශන උපයෝගී කරගෙන ඔහු සේවය කරන හම්බන්තොට යුද හමුදා කඳවුරේදී අද (20 ) අත්අඩංගුවට ගත්බව අකුරැස්ස පොලිසිය කියයි.
 
මෙසේ අත්අඩංගුවට ගෙන ඇත්තේ 35 හැවිරිදි ගාල්ල ප්‍රදේශයේ පදිංචි හමුදා සෙබලෙකු බව පොලිසිය පැවසීය .
 
මොහු  තවත් පුද්ගලයෙකු සමඟ යතුරුපැදියකින් පැමිණ අකුරැස්ස මලිදුව ප්‍රදේශයේ මාර්ගයක ගමන් කරමින් සිටි කාන්තාවකගේ ගෙල බැඳි රන් මාලය කඩා ගෙන ගොස් තිබේ.
 
කොල්ලකා රැගෙන ගිය රන්මාලය ගාල්ල ප්‍රදේශයේ රන් භාණ්ඩ උකස් ගන්නා ස්ථානයකට ලබාදී රුපියල් 37,000 ක මුදලක් ලබාගෙන ඇති බව මූලික විමර්ශනවලදී අනාවරණය වූ බව පොලිසිය කියයි.