(අජිත්ලාල් ශාන්තඋදය සහ ආරියරත්න මාමුහේවා)

කතානායකවරයාට පාර්ලිමේන්තුව පවත්වාගෙන යාමට අවරහිර වන සේ ඒකාබද්ධ විපක්‍ෂයේ මන්ත්‍රීවරුන්ගේ හැසිරීම හෙළා දකිමින් විරෝධය පෑ නිවිතිගල ප්‍රාදේශීය සභාවේ විපක්‍ෂය නියෝජනය කරන එක්සත් ජාතික පක්‍ෂයේ සභිකයන් හය දෙනෙක් අද (21) සභාවෙන් පිටව ගියහ.

නිවිතිගල ප්‍රාදේශීය සභා ශ්‍රවනාගාරයේදී උප සභාපති විජිත වැරණියගොඩ මහතාගේ මූලාසනයෙන් අද (21) එම සභාව පැවැත්විණි. සභාව ආරම්භ කරන අවස්ථාවේ විපක්‍ෂ කණ්ඩායම් නායක පියසේන පොල්වත්ත (එජාප) මහතා නැගී සිටිමින් පසුගියදා පාර්ලිමේන්තුවේ ඒකාබද්ධ විපක්‍ෂයේ මන්ත්‍රීවරුන්ගේ හැසිරීම හෙළා දකිමින් අදහස් දැක්වීය. 

එසේම කතානායකවරයා වෙත දිගින් දිගටම චෝදනා එල්ල කිරීම තම කණ්ඩායම අනුමත නොකරන බව කී ඒ මහතා සභාවෙන් පිටව ගියේය.

සුනිල් සේරසිංහ, සුසන්ත රූපසිංහ, ඒ. සුරේෂ් කාන්ත්, ගීතා එක්නැලිගොඩ, නිශාන්ති ප්‍රියදර්ශනී යන සභික සභිකාවෝ විපක්‍ෂ කණ්ඩායම් නායකයා සමඟ සභාවෙන් පිටව ගියහ.

එක්සත් ජාතික පක්‍ෂ සභිකයන් ඉවත්ව ගිය ද සෙසු සභිකයන් හා එක්ව සභාව ඉදිරියට පවත්වාගෙන යාමට විජිත වැරනියගොඩ මහතා පියවර ගත්තේ ය.