(ප්‍රසන්න පත්මසිරි)

ඌව පළාතේ රාජ්‍ය සේවකයින් රාජකාරී වේලාවේදී ෆේස්බුක්, වයිබර්, ඉමෝ, වට්ස්අප් ඇතුළු සමාජ මාධ්‍ය ජාල භාවිතා නොකර ජනතාවට සේවය කරන්නැයි ඌව ආණ්ඩුකාර ජනාධිපති නීතීඥ මෛත්‍රී ගුණරත්න මහතා පැවසීය.

ඌව වෙල්ලස්සේ අනාගතය උදෙසා ඌව ක්ලීන් ග්‍රීන් නැමති වැඩසටහන ආරම්භ කරමින් ආණ්ඩුකාරවරයා එසේ කීය.

ඌව ආණ්ඩුකාර කාර්යාලය මගින් පළාතේ සියලුම නගර පිරිසිදු කීරීමේ නව වැඩ සටහනක් ආරම්භ කර තිබෙන අතර සියලුම නගරවල අවධිමත් ලෙස ප්‍රදර්ශනය කර තිබෙන බැනර්, පෝස්ටර්, ඇතුළු ප්‍රදර්ශන පුවරු ඉවත් කිරීමට ද කටයුතු කර තිබේ.

එම වැඩසටහනේ ප්‍රථම අදියර වශයෙන් බදුල්ල නගරය පවිත්‍ර කිරීම ආණ්ඩුකාරවරයාගේ ප්‍රධානත්වයෙන් බදුල්ල විල්ස් පාක් ක්‍රීඩා පිටියේ දී ආරම්භ විය.

එහිදී මෛත්‍රී ගුණරත්න මහතා මෙසේද කීය.

"ඌව කියන්නේ දුප්පත් මිනිස්සු ඉන්න පළාතක්. කාර්යාල වේලාවේදී නිලධාරීන් මොබයිල් ෆෝන් එක බලාගෙන ෆේස්බුක්, වයිබර්, ඉමෝ, වට්ස්ඇප්වල ඇතැම් නිලධාරීන් ඉන්න බවට මට පැමිණිලි ලැබී තිබෙනවා.

එහෙම ඉන්නවානම් මේක කරුණාකරලා නතර කරන්න රාජකාරී වේලාවේදී පෞද්ගලික කටයුතු කරන්න එපා. අහිංසක ජනතාවගේ බදු මුදලින් තමයි අපි පඩි ගන්නේ. රාජකාරී කරන වේලාවේදී රාජකාරිය හරියටම කරන්න" යැයි මෛත්‍රි ගුණරත්න මහතා පැවසිය.