(එෆ්.අස්ලම්)
 
උතුරු පළාතේ වැව් 15ක් ප්‍රතිසංස්කරණය කරමින් කෘෂිකර්මාන්තය දියුණු කිරීමට උතුරු පළාත් ආණ්ඩුකාර ආචාර්ය සුරේන් රාඝවන් මහතාගේ සභාපතීත්වයෙන් පැවති විශේෂ සාකච්ඡාවකදී තීරණය කර තිබේ.

මේ අනුව පළාතේ සෑම දිස්ත්‍රික්කයක්ම ආවරණය වන පරිදි එක් දිස්ත්‍රික්කයකින් වැව් 3 ක් වශයෙන්  වැව් 15 ක් ප්‍රතිසංස්කරණය කෙරේ.

පළමු අදියර සඳහා  රුපියල් මිලියන 11.65 ක මුදලක් ජාතික ප්‍රතිපත්ති, ආර්ථික කටයුතු, නැවත පදිංචි කරවීම සහ පුනරුත්ථාපනය, උතුරු පළාත් සංවර්ධන හා තරුණ කටයුතු අමාත්‍යාංශය විසින් වෙන් කර ඇත.

ප්‍රතිසංස්කරණයේදී  වැව් ගැඹුරු කර පුළුල් කරනු ඇති අතර, පසුව  ඒවා ගොවීන්ට භාර දෙනු ඇත.

මෙම සාකච්ඡාව පළාත් ආණ්ඩුකාර කාර්යාලයේදී පැවති අතර ආණ්ඩුකාරවරයාගේ ලේකම්, මුලතිව් දිස්ත්‍රික්කයේ රජයේ නියෝජිත, කෘෂිකර්ම අමාත්‍යාංශයේ ලේකම් සහකාර කෘෂිකර්ම දෙපාර්තමේන්තුවේ කොමසාරිස්, කිලිනොච්චි සහ යාපනය දිස්ත්‍රික්කවල ප්‍රාදේශීය ලේකම්වරු, අදාළ රජයේ නිලධාරීහු සහ දිස්ත්‍රික්ක පහක ගොවි සංගම් නියෝජිතවරු ඊට සහභාගී වූහ.