(දයාරත්න ඇඹෝගම)

උතුරු මැද පළාතේ පාසල්වල පුරප්පාඩුව පවතින විදුහල්පති තනතුරු පිරවීම සඳහා සම්මුඛ පරීක්ෂණ පවත්වා වසරක් ගතව ඇතත් මෙතෙක් එම පුරප්පාඩු පුරවා නොමැති බව ලංකා ගුරු සේවා සංගමයේ අනුරාධපුර දිස්ත්‍රික් ලේකම් ජනතා විමුක්ති පෙරමුණේ අනුරාධපුර මහ නගර සභාවේ නාගරික මන්ත්‍රී අසේල විජේසිංහ මහතා පවසයි.

අනුරාධපුර නගරයේ අද (14) දින පැවති මාධ්‍ය හමුවකදී ලංකා ගුරු සේවා සංගමයේ අනුරාධපුර දිස්ත්‍රික් ලේකම්වරයා මේ බව සඳහන් කළේය.

මෙහිදී වැඩි දුරටත් අදහස් දැක්වූ අසේල විජේසිංහ මහතා මෙසේද පැවසීය.

              ‘‘උතුරු මැද පළාත් සභාව මගින් පාලනය වන පාසල් 816 ක් තිබෙනවා.මේ පාසල් වල විදුහල්පතිවරු සහ නියෝජ්‍ය විදුහල්පතිවරුන් සඳහා තනතුරු 1017 ක් තිබෙනවා.

මේ පාසල්වල පවතින විදුහල්පතිවරුන්ගේ පුරප්පාඩු පිරවීම සඳහා උතුරු මැද පළාත් අධ්‍යාපන දෙපාර්තමේන්තුවෙන් ගැසට් නිවේදනයක් මගින් සම්මුඛ පරීක්ෂණයකුත් පවත්වලා මාස 12 කුත් දැන් ගෙවිලා ගිහින්.එහෙත් සුදුසුකම් තිබෙන ගුරුවරු විදුහල්පති තනතුරු වලට මෙතෙක් පත්කරලා නැහැ.

මේ වන විට උතුරු මැද පළාතේ පාසල්වල රාජකාරි ආවරණය කරන ගුරුවරු 385 ක් පමණ සිටිනවා.

මෙම හේතුව නිසා පාසල්වල රාජකාරි කටයුතු වලදී  නිවරුදි තීන්දු තීරණ ගැනීමට නොහැකි වීමෙන් ගැටළු රැසක් නිර්මාණයවී තිබෙනවා.පාසල්වල පරිපාලනය කඩාවැටිලා.මේකට හේතුව පළාත් අධ්‍යාපන බලධාරින්ගේ නොසැලකිල්ල.

විදුහල්පතිවරු ලෙස සේවය කිරීමට සුදුසුකම් ලත් ශ්‍රේණිධාරි ගුරුවරු දහසකට අධික පිරිසක් සිටියත් ඔවුන් පුරප්පාඩුවී ඇති විදුහල්පති තනතුරු සඳහා පත් නොකිරීම තේරුම් ගත නොහැකි බවද අසේල විජේසිංහ මහතා මෙහිදී පැවසීය.

මේ සම්බන්ධයෙන් අප පළාත් අධ්‍යාපන අමාත්‍යාංශයේ ලේකම් තිලක බණ්ඩාර මහතා ගෙන් කළ විමසුමේදී හෙතෙම මෙසේ පැවසීය.

විදුහල්පතිවරුන්ගේ සහ ගුරුවරුන්ගේ වාර්ෂික ස්ථාන මාරු කිරීම සඳහා තව ඇත්තේ මාස හතරක කාලයක්.මෙම වාර්ෂික ස්ථාන මාරු කිරීම් තුල විදුහල්පතිවරු පත්කිරීමත් ගැටළු සහගතයි.එම නිසා පළාත් ආණ්ඩුකාරවරයාගේත් උපදෙස් ලබා ගෙන ලබන වසරේ මුල් භාගයේදි පමණ විදුහල්පතිවරුන් පත්කිරීමට කටයුතු කරන බවද ලේකම්වරයා මෙහිදී පැවසීය.