(ජයන්ත සමරකෝන්)

ආරක්ෂක රාජකාරියේ යෙදී සිටි සිවිල් ආරක්ෂක භටයෙකුට පහරදුන් බව කියන සිද්ධියක් සම්බන්ධයෙන් සැකපිට පුත්තලම ප්‍රාදේශීය සභාවේ මන්ත්‍රීවරයෙකු සහ ඔහුගේ ගෝලයෙකු අද (19) අත්අඩංගුවට ගෙන රිමාන්ඩ් භාරයට පත්කර ඇතැයි පුත්තලම පොලිසිය පැවැසීය.

සිද්ධියෙන් තුවාල ලබා ඇති සිවිල් ආරක්ෂක භටයා වනාතවිල්ලුව සිවිල් ආරක්ෂක බලකායේ භටයෙකු බවත් ඔහු මේ වන විට පුත්තලම රෝහලේ ප්‍රතිකාර ලබන බවත් පොලිසිය කීය.

සිවිලි ආරක්ෂක භටයා ඊයේ (18) පුත්තලම ප්‍රාදේශීය ලේකම් කාර්යාලයේ ආරක්ෂක රාජකාරියේ යෙදී සිටියදී එහි පැමිණි සැකකාර මන්ත්‍රීවරයා පරීක්ෂා කිරීම සඳහා හැඳුනුම්පත ඉල්ලා සිටින විට පැත්තකට රැගෙන ගොස් සිවිලි ආරක්ෂක භටයාට කනට ගසා ඇති  බවත් පසුව පැමිණි මන්ත්‍රීවරයාගේ ගෝලයෙකු සිවිලි ආරක්ෂක භටයාට දිගටම කණට පහරදී ඇති බවත් මේ පිළිබඳව කර ඇති පැමිණිල්ලේ සඳහන් වේ.

පුත්තලම ප්‍රාදේශීය ලේකම් කාර්යාලයේ කාර්යමණ්ඩලය ප්‍රාදේශීය සභාවේ මන්ත්‍රීවරයාට එරෙහිව විරෝධතාවයක්ද පවත්වා ඇති බව පොලිසිය සඳහන් කළේය.

හෙට (20) සැකකාර මන්ත්‍රීවරයා හඳුනාගැනීමේ පෙරට්ටුවකට ඉදිරිපත් කරන බවද පොලිසිය පැවැසීය.