(මහේෂ් කිර්තිරත්න)
 
වන අලි පැන්නීමේ මෙහෙයුම්වලදී වනජීවි නිලධාරින්ගේ ජීවිත ආරක්ෂාව වෙනුවෙන් නවීන ඩ්‍රෝන කැමරා ලබාදීමේ වැඩපිළිවෙලක් සකස් කරන බව මාතලේ දිස්ත්‍රික් සම්බන්ධීකරණ කමිටුවේ  සභාපති පාර්ලිමේන්තු මන්ත්‍රී නීතීඥ ලක්ෂ්මන් වසන්ත පෙරේරා මහතා පැවසීය.
 
දිස්ත්‍රික් සම්බන්ධීකරණ කමිටුවේදී සභාපතිවරයා මේ බව පැවසීය.
 
දුර සිට වන අලින් සිටින ස්ථාන පහසුවෙන් නිරීක්ෂණය කිරීමට ඩ්‍රෝන කැමරා භාවිත කළ හැකි බවද, වනජීවී අමාත්‍යවරයා සමඟ සාකච්ඡා කර කැමරා ලබාදීමට කටයුතු කරන බවද වසන්ත මහතා කීය.
 
මාතලේ රජ්ජම්මන ප්‍රදේශයේදී වන අලින් පලවා හැරීමේ මෙහෙයුමකදී මිය ගිය වන ජීවී අඩවි සහකාර නිලධාරී මධුෂාන් වික්‍රමසිංහ මහතා වෙනුවෙන් ශෝකය පළ කළ මන්ත්‍රීවරයා මෙම තාක්ෂය භාවිත කළේ නම් ඔහුගේ ජීවිතය බේරගත හැකිව තිබූ බවද පැවසීය. ඉදිරියේදී එවැනි සිදුවීම් නොවීමට අවශ්‍ය පියවර ගන්නා බවද හෙතෙම සඳහන් කළේය. ‌