(ඉන්දික අරුණ කුමාර)

මොරගහකන්ද ජලාශයට යටවූ නාඋල ප්‍රාදේශීය ලේකම් කොට්ඨාසයේ ග්‍රාම නිලධාරී වසම් 6 ක වන අලි ගැවසීම ජනජීවිතයට බාධාවක් වී ඇතැයි ප්‍රදේශවාසීහු කියති.
 
කඹරව, ගල්පෝරැගොල්ල, ඇලගමුව, කඩවත, කෝන්ගහවෙල හා රජාවෙල ගම්මානයන්හි  නිරන්තර වන අලි ගැවසීම හේතුවෙන්  දුෂ්කරතා රැසකට තමන් මුහුණ දී ඇති බව ගොවීහු කියාසිටිති.
 
මොරගහකන්ද ජලාශය ආශ්‍රිතව ආහාර හා ජලය තීබිම හේතුවෙන් ඒ ආශ්‍රීතව වන අලි ගැවසීමට ප්‍රියකරන අතර අවට වගාවන්වලට ද මෙම වන අලි හානි කරති.
 
අඹන මහ වෙල් යායට අයත් වගාවන්, සේනාගම, මොරගොල්ල ප්‍රදේශවල බෝග වගාවන් මේ හේතුවෙන් අවදානම් තත්ත්වයට පත්ව තිබේ.
 
වන අලි ගැටළුව සම්බන්ධයෙන් අදහස් දැක්වූ මොරගොල්ල ප්‍රදේශවාසීන් කියා සිටියේ රාත්‍රී කාලයේ ගම්වදින වන අලි හේතුවෙන් සිය දෛනික කටයුතු පවා අඩාල වී ඇති බවයි.

නාඋල ප්‍රාදේශීය ලේකම් කොට්ඨාසයේ පවතින වන අලි ගැටළුව සම්බන්ධයෙන් වනජීවි දෙපාර්තමේන්තුවේ ඇලහැර කාර්යාලයෙන් කළ විමසීමක දී එහි අඩවි අරාක්ෂක රංජිත් කේ. විජිත මහතා පැවසූයේ වන අලි පලවා හැරීමේ මෙහෙයුම් ආරම්භ කර ඇති බවයි.
 
පසුගිය දා ප්‍රදේශයට කරදරයක් වී සිටි වන අලියෙකු අඹන ප්‍රදේශයෙන් අල්ලා ගත් බවත් සෙසු වන අලි ද හැකි ඉක්මනින් ප්‍රදේශයෙන් පලවා හැරීමට කටයුතු කරන බවත් හෙතෙම කියා සිටියේය.