(චන්ද්‍රසිරි ගුණසේකර)

තේ කප්පාදු කරන පිහියකින් ගෙලට පහර දීමෙන් 26 හැවිරිදි තරුණයෙකු මරා දමා ඇතැයි නෙළුව පොලිසිය පවසයි.

සිද්ධියෙන් මියගොස් ඇත්තේ නෙළුව දනවල,පිංකන්දහේන පදිංචිව සිටි කළුආරච්චිගේ තුෂාර ලක්මාල් නැමැති 26 හැවිරිදි තරුණයෙකි.

මෙම තරුණයා පදිංචි නිවෙස අසළ නිවසක පදිංචි පියෙකු හා පුතෙකු අතර ඉකුත් සිකුරාදා සවස ආරවුලක් ඇති වී ඇති අතර මියගොස් සිටින තරුණයා එහි ගොස් එම පියපුතු ගැටුම සමථයකට පත්කිරීමට උත්සාහ දරා ඇත.එම අවස්ථාවේදී ඉන් එක් අයෙකු අතවූ තේ කප්පාදු පිහියකින් එම තරුණයාගේ ගෙලට පහර දීමෙන් ඔහු මියගොස් ඇති බව නෙළුව පොලිසිය කළ පරීක්ෂණ වලදී හෙළිවූ බවද පොලිසිය පවසයි.

මෙම සිද්ධිය සම්බන්ධයෙන් ස්ථානීය මහේස්ත්‍රාත් පරීක්ෂණය උඩුගම මහේස්ත්‍රාත් එච්.එම්.එස්.බණ්ඩාර මහතා විසින් ඊයේ (02) සවස සිදුකරන ලද අතර පශ්චාත් මරණ පරීක්ෂණය අද (03) සිදුකිරීමට නියමිතය.

සිද්ධියට සම්බන්ධ පියා සහ පුතා අත් අඩංගුවට ගෙන ඇති අතර ඔවුන් දෙදෙනා අද (03) උඩුගම මහේස්ත්‍රාත් අධිකරණයට ඉදිරිපත් කිරීමට නියමිතය.

නෙළුව පොලිස් ස්ථානාධිපති ප්‍රධාන පොලිස් පරීක්ෂක අශෝක හේමන්ත බස්නායක මහතා සහ උප පොලිස් පරීක්ෂක ධනපාල විජේනායක මහතා ඇතුළු පොලිස් කණ්ඩායමක් වැඩිදුර පරීක්ෂණ සිදුකරති.