දෙබරවැව ජාතික පාසල

උසස් පෙළ විභාගයට තවත් ඇත්තේ දින කිහිපයක් පමණි. ඒ දින කිහිපයත් තම අධ්‍යාපන කටයුතු වෙනුවෙන් කැප කරමින් අනාගත දිවිය ජයගන්නට තොර තෝංචියක් නොමැති සිතුවිලි රාශියක් පොදි බැඳගෙන ‘‘ඒලෙවල් එක්සෑම්’’ විශිෂ්ට ලෙස ගොඩදාගෙන තම පවුල උසස් මට්ටමකට ගෙන ඒමේ නැවුම් සිහිනය මේ අයුරින් බොඳවීයාවීදෝයි භාග්‍යා දිව්‍යාංජලී කිසිම දිනක නොසිතන්නට ඇත්තේය.  

වර්ෂ 2000 පෙබරවාරි මස 26 දා මෙලොව එළිය දකින ජයවර්ධන කංකානම්ගේ භාග්‍යා දිව්‍යාංජලී, දෙබරවැව ජාතික පාසලේ දක්ෂ ශිෂ්‍යාවකි.  

ඇය මෙවර අ.පො.ස උසස් පෙළ විභාගයට වාණිජ විෂය ධාරවෙන් මුහුණදීමට සිටියාය.  

අඳැල්ල, වීරවිල, ලිපිනයෙහි පදිංචි භාග්‍යා, පවුලේ වැඩිමහල් දියණිය වූවාය. ඇයට බාල තව එක් සොහොයුරෙක්ද සිටී.  

සමෘද්ධිලාභී අඩු ආදායම්ලාභී පවුලක, පෙදරේරු රස්සාවෙන් ආර්ථිකය ගැටගසා ගන්නා සෙනෙහබර පවුලක වැඩිමලා ලෙස ඉපිද, කවද‌ා හෝ සිය පවුලම යම් කිසි මට්ටමකට රැගෙන ඒමේ අහිංසක බලාපොරොත්තු පොදි බැඳගෙන පුරා වසර 19 ක් මුළුල්ලේ එකතු කරගෙන ආ සියලු ප්‍රාර්ථනාවන් එක් තත්පරයකින් මෙලෙස සමාප්තවේවී යැයි භාග්‍යාගේ පවුලේද කිසිවකු නොසිතු තරම්ය.  

ඒත් ඒ අනපේක්ෂිත මූසල හෝරාව දෙස කුරුමානම් බලමින් සිටි සිත්පිත් නැති මරුවා මේ භාග්‍යා දිව්‍යාංජලී නැමැති අහිංසක රූමත් රෝස කැකුළ තම වසඟයට කොටුකර ගැනීමේ දිනය පසුගිය ජූලි 19 දා උදාකරගත්තේ මහත් ශෝචනීය අයුරකිනි.  

‘‘අම්මේ අම්මේ මං හවසට පන්ති ඇරලා ආවම බෝධිපූජාව තියන්න යමුනේ’’ අම්මා මල් කඩලා ලෑස්තිකරලා තියන්නකෝ’’ යැයි පවසමින්. උපකාර පංතිය කරා යන භාග්‍යා වෙනද‌ාසේම තම යහළුවන් සමඟින් සිනාමුසු මුහුණින් ආගිය තොරතුරුද විමසමින් ටියුෂන් පංතියේ කාලය ගත කරන්නේද, තව දින කිහිපයකින් එළඹෙන දිවියේ තවත් එක් කඩ ඉඩමකින් ජයගන්නා වෑයමේ අධිෂ්ඨානය ගැනද සිතේ අපේක්ෂා පොදි බැඳගෙනය. 

 
අපොස සාමාන්‍ය පෙළ විභාගයේදී ඒ සාමාර්ථ හයක් සහ සී සාමාර්ථ තුනක් ලබාගනිමින් උසස් පෙළට ඇතුළත්වෙන භාග්‍යා, දෙබරවැව ජාතික පාසලේ ගුරු සිසු කා අතරත් ප්‍රසිද්ධ චරිතයකි.  

භාග්‍යා දිව්‍යාංජලී සහජයෙන්ම, නර්තනයට දස්කම්පාන අතර, පාසලේදී නර්තන කලාවෙන් සුවිශේෂී දක්ෂතා දක්වා තිබුණාය.   

නිවසේදීත්, භාග්‍යා ඇයගේ කටයුතු රිසිලෙස තමන්ම මැනවින් ඉටුකර ගන්නා කඩිසර ක්‍රියාශීලී අයෙකු වූවාය.  

තම මවට නිරතුරුවම ගෙදර කටයුතු සිදු කරදීමට සහය දුන්නාය. අම්මේ මං පොල් ගාන්නම් කියලා ඇය වරෙක එම කටයුතු කළාය. අම්මේ මං පලා සුද්ධ කරන්නම් කියලා වරෙක තම මවට ඉවුම් පිහුම් කටයුතු සඳහාද භාග්‍යා නොපැකිළිවම සහය දුන්නාය.  

වෙන ළමයි පංති ඇරලා ගෙදර ආවාම ඔළුව රිදෙනවා කියලා කොට්ටේ ඔළුව ගහගෙන පැය ගාණක් ඉන්නවා. එහෙම නැත්නම් ​​ෙෆා්න්වල එල්ලිලා​ෙන ඉන්නේ.  

ඒත් භාග්‍යාට ඒ ලෙඩ තිබුණේ නැත. ඇය තම කටයුතු බොහෝ වෙලාවට තමා විසින්ම කරගන්න කටයුතු කළාය. 

අනේ දෙයියනේ ඇයි මගේ සුදු නෝනා මේවගේ අනතුරකට ලක් කෙරුවේ? මේ අහිංසකාවී කාටවත් කරදරයක් නැහැනෙ.  

අනේ දෙයියනේ ඇයි මෙහෙම අපරාධ වෙන්නේ. අනේ මගේ සුදු නෝනා මට ගෙනල්ලා දෙන්න දෙයියනේ. ඒ භාග්‍යාගේ ආදරණීය මවගේ මුවගින් ඇදහැළෙනා ඒ වචනයන් හදවත් කිළිපොලා යන්නේය.  

මුළු වීරවිල ගම් ප්‍රදේශයම දැඩි ශෝකී බවකින් වෙළීයන්නේ භාග්‍යා දිව්‍යාංජලී සිසුවියට සිදු වූ මේ මහපොළොව නුහුලන අපරාධය හේතුවෙනි.  

ඒ මූලස 19 දා, 19 හැවිරිදි භාග්‍යා තම උපකාරක පංතිය නිමවා නිවසට පැමිණෙමින් සිටියාය.  

බස් රථයකින් වීරවිල තම නිවසට ඒමට භාග්‍යා පිටත් වූවාය. නිවස ආසන්නයේ ඇති බස් නැවතුමින් නිවස කරා යෑමට බැසගත් භාග්‍යා පාර හරහා එම බස් රථය ඉදිරියෙන්ම මාරුවීමට යෑමේදී විරුද්ධ දිසාවෙන් ටිපර් ලොරි මාරයා පැමිණෙන අයුරු මරු වසඟ නිමේෂයේදී නොපෙනෙන්නට විය.  

අධික වේගයෙන් පැමිණි ටිපර් මාරයා මේ අහිංසක රෝස කැකුළ වහා හප්පා දමා නතර වූයේ රටට වටිනාකමක් ගෙන දෙන්නට සිටි දිරිය දියණියකගේ දිවි ගමන මොහොතකින් අඩාළ කරමිනි.  

අනතුරින් තුවාල ලැබූ භාග්‍යාට කඩිනම් ප්‍රතිකාර ලබාදීමට එවෙලෙහිම හම්බන්තොට මූලික රෝහල කරා යැවීමට ප්‍රදේශවාසීහු කටයුතු කළහ.  

හම්බන්තොට රෝහලේ දැඩිසත්කාර ඒකකයේදී භාග්‍යා ජීවිතයත් මරණයත් අතර දැඩි සටනක යෙදෙමින් දිවියට හුස්ම පිඹින්නට මහත් වෙහෙසක් ගත්තාය.  

ඒත් ඒ සෑම දෙයකම නිශ්ඵලතාවය අවසන් මොහොතක් කරා එක් වෙමින් තිබුණේය.  

යොවුන් විය අභියස විකසිත වෙමින් තිබූ මෙම රූමත් රෝස කැකුළ, ටිපර් මාරයාගේ රුදුරු අනතුරින් ශරීර අභ්‍යන්තරයට දැඩිව සිදුව තිබූ තැලීම් හේතුවෙන් අධික රුධිර කාන්දුවේ ප්‍රතිඵලයක් ලෙසට දිවි ගමනට සමුදීමට භාග්‍යා දිව්‍යාංජලී මෙනවියට සිදුවූයේ ඉතාමත් අවාසනාවන්ත ලෙසිනි.  

භාග්‍යාගේ අවසන් නිමේෂයේදී ආදරණීය අම්මා, තාත්තා, කවිඳු අයියාගේද නම් මුවින් පිටකරමින් ඈ දෙනෙත් සදහටම පියා ගත්තේ ඒ අසල සිටි සැම දෙනාගේම නෙතට කඳුළක් එක්කරමිනි.

භාග්‍යාගේ මෘත දේහය

කථාව සහ සේයා කතරගම විශේෂ 
රුක්මන් රත්නායක