(රෝෂන් තුෂාර)

හොරු ඔප්පුවක් සාදා එය ලියාපදිංචි කිරීම සඳහා හෝමාගම ඉඩම් කාර්යාලයේ රෙජිස්ට්‍රාර් වරයාට ලබා දුන්නේ යැයි කියන හෝකන්දර පුද්ගලයකුට වසරක බරපතල වැඩ සහිත සිර දඬුවම් කොළඹ ප්‍රධාන මහේස්ත්‍රාත් තිළිණ ගමගේ මහතා අද (09) නියම කළේය.

හෝකන්දර දකුණ පදිංචි  පුද්ගලයකුට මෙම දඬුවම් නියම කළ ප්‍රධාන මහේස්ත්‍රාත්වරයා රුපියල් 1500ක දඩයක්ද නියම කෙළේය.

2010 ඔක්තෝම්බර් මස 05 වැනි දින හා 2011 නොවැම්බර් මස 10 දින අතර කාලය තුළදී කොළඹ අට බොරැල්ල සුපිරි වෙළඳ සංකීර්ණය තුළදී සාදන ලද ඉඩම් ඔප්පුවක ව්‍යාජ බව දැන දැනම එය ලියාපදිංචි කිරීම සඳහා හෝමාගම ඉඩම් රෙජිස්ට්‍රාර්  කාර්යාලයේ රෙජිස්ටාර්වරයාට  ලබා දීම තුළින් කූට ලේඛන සැකසීම,දණ්ඩ නීති සංග්‍රහයේ 459 වගන්තිය ප්‍රකාරව දඬුවම් ලැබිය යුතු වරදක් සිදුකිරීම චෝදනාව යටතේ මෙම නඩුව පවරා තිබිණි.

නඩුව දීර්ඝ වශයෙන් විභාග කර සාක්ෂි විමසීමෙන් අනතුරුව මෙම තීන්දුව ප්‍රකාශයට පත් කළේය.

වංචා විමර්ශන කාර්යාංශය වෙනුවෙන් පොලිස් සැරයන් (41056) කුමාරසිරි සහ පොලිස් කොස්තාපල් (91869)මදුශාන් යන නිලධාරීන්  පෙනී සිටියහ.