(සුජිත් හේවාජුලිගේ සහ  දඹුල්ලේ කාංචන කුමාර ආරියදාස)

දේශීය සහල් සඳහා රජය විසින් පනවනු ලැබූ  පාලන මිලට (උපරිම සිල්ලර මිල) වඩා අඩු මිල ගණන් වලට සහල් වර්ග  වෙළෙඳපොළේ  අලෙවි  කෙරෙන  හෙයින් රජයේ එම පාලන මිල ගැසට්ටුවෙන්  පාරිභෝගිකයෝ දැඩි දුෂ්කරතාවයට පත්ව සිටිති.

වෙළෙඳපොළේ දේශීය සහල් සඳහා මෙම නව  මිල පාලනය  ඊයේ  (2)  සිට ක්‍රියාත්මක කෙරිණ.

නව පාලන මිල ගැසට් නිවේදනය අනුව  නාඩු සහල් කිලෝවක්  අලෙවි කළ හැකි උපරිම සිල්ලර මිල වන්නේ  රුපියල් 220කි.

එසේම සම්බා සහල් කිලෝවක් රුපියල් 230ක උපරිම සිල්ලර මිල කටද    කීරි සම්බා කිලෝවක්  රුපියල් 260ක   උපරිම සිල්ලර මිලකටද  අලෙවි කිරීමට  අවස්ථාව සැලසෙනු ඇත.

එහෙත් රජය විසින් නිකුත් කරන ලද ගැසට් නිවේදනයේ සඳහන් මිලට  වඩා අඩු මිල ගණන්වලට දේශීය සහල් වර්ග  තොග සහ සිල්ලර වෙළෙඳ සල්වල අලෙවි කෙරෙන හෙයින්  රජයේ මෙම මිල  පාලනය විහිළුවක් බව පාරිභෝගිකයෝ පවසති .

මේ සම්බන්ධයෙන් අදහස් දක්වන සහල් වෙළෙඳසල් හිමියන් පවසන්නේ   රජය වෙළඳපොළේ සහල් මිල පිළිබඳව සොයා බැලීමකින් තොරව පාලන මිල පිළිබඳ   මෙම ගැසට් නිවේදනය නිකුත් කර ඇතැයි පෙනී යන බවයි.

එසේ නැතිනම් ව්‍යාපාරික වුවමනාවන් ඉටු කිරීම සඳහා  පාලන මිල මුවාවෙන්  සහල් මිල  තවදුරටත් වැඩි කිරීමට මේ ආකාරයට පියවර ගත්තාදැයි  සැකයක් මතුවන බවද  ඔවුහු සඳහන් කරති.

සාමාන්‍යයෙන් වෙළඳපොළේ  නාඩු සහල් කිලෝවක් රුපියල් 190 සිට  සිට රුපියල් 210 දක්වා  මිල ගණන්වලට අලෙවි කෙරුණු  අතර සම්බා කිලෝවක් අලෙවි කෙරුණේ  රුපියල් 215 සිට 220 දක්වා වූ මිල ගණන්වලටය.

කීරි සම්බා කිලෝවක් රුපියල් 250කට පමණ අලෙවි කෙරිණ.