සබරගමු පළාත් හිටපු ඇමැති රිමාන්ඩ්

(අජිත්ලාල් ශාන්ත උදය, රෝහණ සමරවීර සහ  ජයන්ත නානායක්කාර)

රුපියල් කෝටි හතක රාජ්‍ය මුදලක් වංචනිකව පරිහරණය කිරිම සම්බන්ධයෙන් අපරාධ පරීක්ෂණ දෙපාර්තමේන්තුව මගින් අත්අඩංගුවට ගත් සබරගමු පළාත් සභාවේ පළාත් මාර්ග සංවර්ධන ග්‍රාමීය යටිතල පහසුකම්, සංචාරක, ක්‍රීඩා හා යෞවන කටයුතු හිටපු අමාත්‍ය අතුල කුමාර රාහුබද්ධ  ඔක්තෝම්බර් මස 02 වැනි දා දක්වා රිමාන්ඩ් බාරයේ තබන ලෙස ඇඹිලිපිටිය ප්‍රධාන මහේස්ත්‍රාත්  තිළිණ මහේෂ් පීරිස් මහතා අද නියෝග කළේය.

ලෙල්ලොපිටිය, වැලිමලුව හන්දිය, ගෝණකුඹුර යන ලිපිනයේ පදිංචි සැකකරු අත්අඩංගුවට ගැනීමට පරීක්ෂා කිරීමේදී  නීතීඥයකු මාර්ගයෙන් මුල්‍ය හා අපරාධ විමර්ශන අංශ 03 වෙත ඉදිරිපත්වීමෙන් පසු අත්අඩංගුවට ගත්තේය.

සැකකරුගෙන් ප්‍රකාශ සටහන් කරගැනීමෙන්  ඇඹිලිපිටිය මහේස්ත්‍රාත් අධිකරණය වෙත ගෙනෙනු ලැබීය. 

සබරගමු පළාත් මාර්ග අමාතයාංශය මගින් 2016-2017 වර්ෂවල වෙන්කරන ලද මුදල් ඇඹිලිපිටිය ප්‍රාදේශීය සභාව ක්‍රියාකාරී ආයතනය ලෙස තෝරාගනිමින් සිදුකරන ලද ව්‍යාපෘති 77කට අදාලව ව්‍යාපෘති  සිදුනොකර රුපියල් 7,16,45,226.32ක මුදලක් සම්බන්ධයෙන් රජයට පාඩුවන අන්දමින් කටයුතු කරමින් කුමන්ත්‍රණය කිරිම මගින් පොදු දේපල පනතේ 5 -1 සමග කියවිය යුතු ලංකා දණ්ඩ නීති සංග්‍රහ පනතේ 386, 389 සහ 400 සහ ලංකා දණ්ඩ නිති සංග්‍රහ පනතේ 102 සහ 113 (අ) යන වරදවල් කර ඇති බවට සැකකරන නිසා හිටපු ඇමතිවරයා අත්අඩංගුවට ගත් බවද විමර්ශන නිලධාරීහු අධිකරණයට දැන්වූහ.