(රන්ජන් කටුගම්පොල)

සබරගමුව විශ්ව විද්‍යාලයේ ඉංජිනේරු තාක්ෂණ පීඨයේ සිසුවකු නවක වදයට ලක්වීම හේතුවෙන් සියදිවි නසා ගැනීමේ සිද්ධියට අදාළව විමර්ශනයක් කර සිද්ධියට සම්බන්ධ සිසුන්ට එරෙහිව සුදුසු පියවර ගන්නැයි ඉල්ලා ශ්‍රී ලංකා නීතිඥ සංගමය ගොනුකර තිබූ මූලික අයිතිවාසිකම් පෙත්සමේ වගඋත්තරකරුවන් වශයෙන් නම් කර සිටින සබරගමුව විශ්ව විද්‍යාලයේ උපකුලපතිවරයා ඇතුළු සනාතන සභාව වෙනුවෙන් නීතීපතිවරයා පෙනී නොසිටින බව ශ්‍රේෂ්ඨාධිකරණයට අද දැනුම් දුන්නේය.

පෙත්සම කැඳවූ අවස්ථාවේදී නීතීපතිවරයා වෙනුවෙන් පෙනී සිටි රජයේ ජේෂ්ඨ නීතිඥ ජයනි වල්ගම්පාය මහත්මිය මේ බව දැනුම් දුන් අතර කරුණු තහවුරු කිරීම සඳහා පෙත්සම අගෝස්තු 29 වැනිදා කැඳවන ලෙස නියෝග කළ ශ්‍රේෂ්ඨාධිකරණය සියදිවි නසාගත් සිසුවාගේ මව්පියන් ගොනුකර ඇති පෙත්සම සම්බන්ධයෙන් යළි නොතීසි නිකුත් කළේය.

පෙත්සම සම්බන්ධයෙන් සීමිත විරෝධතා ඇත්නම් ඒවා ගොනුකරන ලෙස අධිකරණය වගඋත්තරකාර පාර්ශ්වයට නියෝග කළේය. ශ්‍රේෂ්ඨාධිකරණ විනිසුරුවරුන් වන දිලීප් නවාස්, අර්ජුන ඔබේසේකර සහ සෝභිත රාජකරුණා යන මහත්වරුන්ගෙන් සමන්විත විනිසුරු මඩුල්ලක් හමුවේ පෙත්සම සලකා බැලීණී.

ශ්‍රී ලංකා නීතිඥ සංගමයේ සභාපති රජීව අමරසූරිය සහ ලේකම් චරිත් ගල්හෙන යන මහත්වරු ගොනුකර ඇති පෙත්සමේ වගඋත්තරකරුවන් වශ්‍යයෙන් සබරගමුව විශ්ව විද්‍යාලය  උපකුලපතිවරයා, සනාථන සභාව ඇතුළු පිරිසක් නම් කර ඇත.