(අංජුල මහික වීරරත්න)

වසර 21 ක් තිස්සේ රටට ශක්තිමත් ආණ්ඩුවක් ලබා දුන්නා යැයි අපේ විරුද්ධ වාදීන් පවසනවා. දැන් රටට ආණ්ඩුවක් නැතැයිද ඔවුන් කියනවා. ඔච්චර ශක්තිමත් ආණ්ඩුවක් තිබුණානම්  සුදුසුකම් ඇති ලක්‍ෂ හයක ජනතාව සඳහා  සමෘද්ධිය දෙන්නට නොහැකි වුයේ ඇයි දැයි අග්‍රාමාත්‍ය රනිල් වික්‍රමසිංහ මහතා හෝමාගමදී අද (19) ප්‍රශ්න කළේය.

අප ගමට මුකුත් කළේ නැතැයි එදා කෑ ගසමින් සිටි කල්ලිය දැන් ආණ්ඩුව ගමට කරන සංවර්ධනය ඉවසා ගන්නට නොහැකිව ජාතිවාදය අදිමින් සංවර්ධනය කඩාකප්පල් කරන්නට උත්සාහ දරන බවද අග්‍රාමාත්‍යවරයා පැවැසීය.

අග්‍රාමාත්‍ය රනිල් වික්‍රමසිංහ මහතා මේ බව පැවසුවේ පවුල් ලක්‍ෂ හයක් සඳහා අලුතින් සමෘද්ධි හිමිකම් ප්‍රදානය කිරීමේ ජාතික වැඩසටහනේ කොළඹ දිස්ත්‍රික් උත්සවයේ ප්‍රධාන ආරාධිතයා ලෙස සහභාගී වෙමිනි.

හෝමාගම විල්ෆ්‍රඩ්  සේනානායක ක්‍රීඩාංගනයේදී පැවතී මෙම උත්සවය ප්‍රාථමික කර්මාන්ත සහ සමාජ සවිබල ගැන්වීමේ අමාත්‍යාංශය, සමෘද්ධි සංවර්ධන දෙපාර්තමේන්තුව එක්ව සංවිධානය කළේය.