(මනෝජ් හර්ෂික)
 
2019 වර්ෂයේ සැප්තැම්බර් මාසය අවසන් වීමට පෙර රට පුරා උදා ගම්මාන 2500ක් ඉදිකරන බවත් 2025 වර්ෂය වන විට උදා ගම්මාන 20,000ක් ඉදිකරමින් රටේ සියලු දෙනාට නිවසක් ලබාදීම තම අරමුණ බව නිවාස, ඉදිකිරීම් සහ සංස්කෘතික කටයුතු අමාත්‍ය සජිත් ප්‍රේමදාස මහතා අද (22) පැවැසීය.

ඒ අනුව මෙම ව්‍යාපෘතියේ පළමු අදියර වශයෙන් උදා ගම්මාන 2,500ක් ද දෙවැන්න වශයෙන් ගම්මාන 5,000ක් ද තෙවැන්න වශයෙන් ගම්මාන 10,000 ක් හා සිව්වන අදියර වශයෙන් උදා ගම්මාන 2,500ක් ඉදිකිරීමට නියමිත බව අමාත්‍යවරයා කීය.

හම්බන්තොට දිස්ත්‍රික්කයේ එලල්ල සහ කැටන්වැව ඉදිවූ සඳසිසිලගම සහ සිවරජගම උදා ගම්මාන ජනතා අයිතියට පත් කිරීමේ උත්සවයට එක් වෙමින් අමාත්‍යවරයා අද (22) මේ බව සඳහන් කළේය.

එහිදී වැඩිදුරටත් අදහස් දැක්වූ අමාත්‍යවරයා මෙසේ ද පැවැසීය.

"මේ වන විට දිවයින පුරා උදා ගම්මාන 2,319 ක පමණ ඉදිකිරීම් කටයුතු අප ආරම්භ කර තිබෙනවා. අපගේ පළමු ඉලක්කය වෙත යන්නට තව ගම්මාන ගණන 181 ක් අලුතින් අප ආරම්භ කළ යුතුයි. අප නොසිතූ ලෙස පසුගියදා සිදු වූ ත්‍රස්ත ප්‍රහාරය හේතුවෙන් අපගේ සංවර්ධන වැඩසටහන් මඳක් පසුබෑමට ලක් වුණා. එහෙත් අප මේ වන විට නැවත රජයේ සංවර්ධන කටයුතු ආරම්භ කර තිබෙනවා. කුමන බාධා එල්ල වුවද කෙසේ හෝ අපගේ ඉලක්කය ජය ගන්නවා" යැයි අමාත්‍යවරයා එහිදී කීය.