(බී.ජී.චතුරංග)

ඇලයාපත්තුව පොලිස් වසමේ මනින්ගමුව ප්‍රදේශයේ නිවසකට වල් අලියකු පහර දීම හේතුවෙන් එම නිවසේ නිදා සිටි පාසල් දැරියන් දෙදෙනකු මතට නිවස බිත්තියක් කඩාවැටී තුවාල ලැබූ එම සිසුවියන් දෙදෙනා ප්‍රතිකාර සඳහා අනුරාධපුර ශික්ෂණ රෝහලට ඇතුළත් කර තිබේ.

මෙලෙස තුවාල ලබා ඇත්තේ කුඩා හල්මිල්ලවැව, ඇලයාපත්තුව, මානින්ගමුව ප්‍රදේශයේ පදිංචි වයස අවුරුදු 9 සහ 12ක් වන දැරියන් දෙදෙනෙකි.

මෙම දැරියන් දෙදෙනා පාඩම් කටයුතුවල නිරතවී රාත්‍රී නින්දට ගිය අවස්ථාවේදී වල් අලි රංචුව සිටි එක් අලියකු නිවසට පහර දෙන ශබ්දය ඇසුණු බවත්, ඒත් සමගම නිවසේ බිත්තියක් දරුවන්ගේ ඇඟ මතට කඩා වැටී දරුවන් කෑ ගැසූ බව පියා පවසයි .

පියාගේ කෑ ගැසීමත් සමග එම ස්ථානයෙන් ඉවත්ව ගිය වල් අලියා නැවතත් පැමිණ එම නිවසේ වී ගබඩා කර තිබූ කාමරයේ තිබූ වී තොගයක් ආහාරයට ගෙන ඇති බව ප්‍රදේශවාසීහු පවසති.

මෙම වල් අලි රංචුව මීට දින කිහිපයකට පෙරද ඒ ආසන්නයේ වෙනත් නිවසකට පහරදී බර පතල හානි සිදු කර තිබූ බවත්, මේ වන වනවිට හල්මිල්ලකුලම සහ ඒ අවට ගම්මාන, වන අලි 50ක පමණ රංචුවකගේ ග්‍රහණයට නතු වී ඇති බව ප්‍රදේශවාසීහු පවසති.