රුසියාවේ ප්‍රධාන කුලී හේවා කණ්ඩායමක් වන වැග්නර් ක්‍රියාත්මක කළ කැරැල්ලට ඇමෙරිකා එක්සත් ජනපදයේ සී.අයි.ඒ සංවිධානය සම්බන්ධ බව රුසියාව සහ ජාත්‍යන්තර දේශපාලන විචාරකයෝ පෙන්වා දෙති. 

සී.අයි.ඒ සංවිධානය වැග්නර් කණඩායම සමඟ සබඳතා ගොඩනගා ගනිමින් රුසියානු ජනාධිපති ව්ලැදිමීර් පුටින්ගේ පාලනයට එරෙහිව කැරැල්ලක් දියත් කිරීම සඳහා වැග්නර් කණ්ඩායමට ඇමෙරිකානු ඩොලර් බිලියන 6.2 ක මුදලක් සී.අයි.ඒ සංවිධානය ලබා දී ඇතැයි ජාත්‍යන්තර දේශපාලන විචාරකයන් පෙන්වා දී ඇතැයි මාධ්‍ය වාර්තා කර ඇත.

ඇමෙරිකාව යුක්රේනයට ලබා දුන් ආධාර ගිණුම්ගත කිරීමේදී සිදු ව තිබූ ඇමෙරිකානු ඩොලර් බිලියන 6 ක ගිණුම්කරන දෝෂයේ මුදල් වැග්නර් කණ්ඩායමට ලබා දී ඇතැයි ජාත්‍යන්තර දේශපාලන විචාරකයන් චෝදනා කර ඇත.

කෙසේ නමුත් ඇමෙරිකානු රාජ්‍ය දෙපාර්තමේන්තුව පවසා තිබුනේ රුසියාව චෝදනා කළ ඇමෙරිකානු ඩොලර් බිලියන 6 ක ගිණුම්කරණ දෝෂය සැබැවින්ම දෝෂයක් නොවන බවත් යුක්රේනය ලබා දුන් යුද උපකරණ නැවත ලබා ගැනීමේදී ඇමෙරිකාවට අමතර ඩොලර් බිලියන 6 ක මුදලක් වැය වන බවත්ය.

පසුගියදා රුසියානු ආරක්ෂක අමාත්‍යංශය වැග්නර් කඳවුරකට පහරදුන් බව චෝදනා කරමින් වැග්නර් ප්‍රධානි යෙවුගනී ප්‍රිගෝජීන් කැරැල්ලක් ආරම්භ කළ අතර එම අවස්ථාවේ රුසියානු නගරයක් අල්ලා ගත් අතර හමුදා මධ්‍යස්ථානයක් පාලනයද අතට ගත්තේය.අනතුරුව වැග්නර් හමුදා කණ්ඩායමක් පාගමනේ මොස්කව් දෙසට පැමිණි අතර බෙලරුසියානු ජනාධිපතිවරයාගේ මැදිහත් වීමෙන් වැග්නර් ප්‍රධානි යෙවුගනී ප්‍රිගෝජීන් කැරැල්ල අතරමග නවතා දැමිණි.

වැග්නර් ප්‍රධානි යෙවුගනී ප්‍රිගෝජීන් එරෙහිව රුසියානු ආරක්ෂක අංශ ගොනු කර ඇති අපරාධ චෝදනා ඉවත්කරගෙන නොමැති අතර එම චෝදනාවලට වැරදිකරු වුවහොත් අවුරුදු 12 - 20 ත් අතර කාලයක සිර දඬුවමකට යටත් වීමට සිදුවන බවද පැවැසෙයි.

මේ අවස්ථාව වන විට වැග්නර් කණ්ඩායම අල්ලා ගත් නගරයෙන් සොල්දාදුවන් ඉවත් වෙමින් සිටී. එසේම වැග්නර් සොල්දාදුවන් රණවිරුවන් බවත් රුසියානු ආරක්ෂක අමාත්‍යංශය හෝ වෙනත් ආරක්ෂක සමාගමක ලියාපදිංචි වීමට ඔවුන්ට අවස්ථාව තිබෙන බවත් ජනාධිපති පුටින් පවසා තිබේ.

කෙසේ නමුත් තමන් ජනාධිපති පුටින් පාලනය පෙරළා දැමීමට උත්සාහ නොකළ බවත් හුදෙක් එය විරෝධතාවය ප්‍රකාශ කිරීමක් පමණක් බවත් වැග්නර් ප්‍රධානියා ප්‍රකාශ කර ඇත. ඇමෙරිකානු ජනාධිපති ජෝ බයිඩන් ප්‍රකාශ කර ඇත්තේ වැග්නර් කණ්ඩායම ක්‍රියාත්මක  කළ කැරැල්ලට ඇමෙරිකාවේ කිසිඳු සම්බන්ධයක් නොමැති බවයි.

(034)