(අංජුල මහික වීරරත්න)

"වන සතුන්ගෙන් සිදුවන වගා හානි වලක්වා ගැනීම පිළිබඳව මින් පසු අපෙන් අහන්න එපා" යැයි කෘෂිකර්ම අමාත්‍ය මහින්ද අමරවීර මහතා පැවසීය.

වන සතුන්ගෙන් වන වගා හානි නිසා රටේ ගොවීන් විදින දුක කොළඹ සීත කාමර වලට වී ඩොලර් වලින් යැපෙන සත්ත්ව සුබසාධන සංගම්වල මහත්වරුන්ට සහ නෝනලාට තේරෙන්නේ නැතැයි ද අමාත්‍යවරයා සඳහන් කළේය.

රිලවුන් චීනයට නැංවීමේ වැඩසටහන සම්බන්ධයෙන් කොළඹ දී මාධ්‍යවේදීන් ඇසූ ප්‍රශ්නයකට පිළිතුරු දෙමින් අමරවීර මහතා මේ බව කීය.

මෙරට රිලවුන් චීනයේ සත්වොද්‍යාන වලට ලබාදීමේ වැඩපිළිවෙලට ඇතැම් පරිසර සංවිධාන ගෙන ඇති නීති ක්‍රියාමාර්ග නිසා එම වැඩපිළිවෙළ නැවතී ඇති නමුත් චීනයේ පෞද්ගලික සමාගමක් තවමත් එම සතුන් ලබා ගැනීම සඳහා ඉදිරිපත් වී සිටින බවද කෘෂිකර්ම අමාත්‍යවරයා කීය.

වගාවන්ට සිදුවන සත්ව හානි වලක්වා ගැනීම සඳහා පරිසර සංවිධාන ඇතුළු විවිධ පාර්ශව වලින් කෘෂිකර්ම අමාත්‍යංශය යෝජනා ලබා ගැනීමේදී ඇතැම් සත්ව සුබසාධන සංගම් විකාර විසඳුම් ඉදිරිපත් කළ බව කී අමාත්‍යවරයා සාරි එල්ලීම ,ගොවි පොළ වටේ ටකරං බැඳීම,වගා බිමෙන් අක්කර භාගයක් වන සතුන්ට කෑමට ඉතිරි කිරීම ආදී විසඳුම් ද ඔවුන් ලබාදුන් බව කීය.

චීනයේ සත්වෝද්‍යාන වලට රිලවුන් යැව්වා නම් ඔවුන් මිනිසුන්ගේ ආදරය කරුණාව මැද ජීවත්වන බව කී කෘෂිකර්ම අමාත්‍යවරයා වගා ආරක්ෂා කර ගැනීම සඳහා ගොවීන් තුවක්කු ඉල්ලන බවද එවිට අවසානයේ වන්නේ කුමක්දැයි ප්‍රශ්න කළේය.