(සුමිත් පොතුපිටිය සහ සමන් කාරියවසම්)

මුදල් ඔට්ටුවට පැවැත්වූ ත්‍රිරෝද රථ රේස් තරගයක් යතුරුපැදියකින් යමින් වීඩියෝ ගත කරමින් සිටී තරුණයන් දෙදෙනෙකු ආලෝක විදුලි කනුවක ගැටීමෙන් එක් තරුණයකු මියගොස් ඇති බවත් තවත් තරුණයකු බරපතළ තුවාල ලබා ඇති බවත් පානදුර දකුණ පොලිසිය පවසයි .

අනතුරෙන් මියගොස් ඇත්තේ පානදුර නල්ලූරුව මොරවින්න ප්‍රදේශයේ පදිංචිව සිටී ජයවීර ලියනගේ දේශාන් පෙරේරා නමැති 19 හැව්රිදි තරුණයකු බව පොලිසිය කීය.

කළුතර දෙස සිට පානදුර දෙසට ත්‍රීරෝද රථ තරගයක් පවත්වා ඇති බවත් , තවත් තරුණ පිරිසක් යතුරුපැදි වලින් තරගය වීඩියෝ ගතකරමින් පැමිණ ඇති බවත් පොලිසිය පවසයි .

එහිදී එක් යතුරුපැදියක් නල්ලූරුව ප්‍රදේශයේ දී මාර්ගයෙන් ඉවතට පැන විදුලි කනුවක ගැටී ඇති අතර බරපතළ තුවාල ලැබූ තරුණයන් දෙදෙනා පානදුර මූලික රෝහලට ඇතුලත් කර ඇති බවත් සදහන් වේ.

මියගොස් ඇති තරුණයා කොළඹ ජාතික රෝහලට යොමුකර ඇතත්, නැවත පානදුර මූලික රෝහලට යොමුකර සිරුරේ අභ්‍යන්තර ඉන්දියන් වලට සිදුවූ බරපතළ තුවාල හේතුවෙන් ඇතිවූ සංකූලතා මරණය සිදුව ඇති බවට අධිකරණ වෛද්‍ය නිළධාරී ප්‍රසාන් විජේතුංග මහතාගේ ප්‍රධානත්වයෙන් සිදුකල පශ්චාත් මරණ පරීක්ෂණයේදී තහවුරුව ඇති බව සදහන් වේ.