(අංජුල මහික වීරරත්න)

කැලණිවැලි දුම්රිය මාර්ගය අවිස්සාවේල්ලෙන් ඔබ්බට රත්නපුර දක්වා දීර්ඝ කිරීම සඳහා ශක්‍යතා අධ්‍යයනය හා සවිස්තරාත්මක සැලසුම් සකස් කිරීම සඳහා වන උපදේශන සේවාව ලබා ගැනීමට කැබිනට් අනුමැතිය ලැබී ඇත.

කැලණිවැලි දුම්රිය මාර්ගය අවිස්සාවේල්ලෙන් ඔබ්බට රත්නපුර දක්වා දීර්ඝ කිරීම පිණිස ශක්‍යතා අධ්‍යයනයක් සිදු කිරීම සඳහා සහ සවිස්තරාත්මක සැලසුම් සකස් කිරීම සඳහා 2025-10-21 දින පැවති අමාත්‍ය මණ්ඩල රැස්වීමේදී අනුමැතිය ලබා දී ඇත.

ඒ සඳහා අභිලාෂ කැඳවීම ජාතික තරඟකාරී ප්‍රසම්පාදන ක්‍රමවේදය යටතේ සිදු කරනු ලැබ ඇති අතර, ලංසුකරුවන් 08 දෙනෙකු අභිලාෂ ඉදිරිපත් කරනු ලැබ තිබේ.

ඒ අතරින් කෙටි ලැයිස්තු ගත කරනු ලැබූ ලංසුකරුවන් විසින් ඉදිරිපත් කරනු ලැබූ තාක්ෂණික යෝජනා ඇගයීමෙන් අනතුරුව සුදුසුකම් ලබා ඇති ආයතන 04 ක මූල්‍ය යෝජනා විවෘත කර ඇත. 

එකී මූල්‍ය යෝජනා ඇගයීමෙන් අනතුරුව කැලණි වැලි දුම්රිය මාර්ගය අවිස්සාවේල්ලෙන් ඔබ්බට රත්නපුර දක්වා දීර්ඝ කිරීම පිණිස ශක්‍යතා අධ්‍යයනය හා සවිස්තරාත්මක සැලසුම් සකස් කිරීම සඳහා වන උපදේශන සේවා කොන්ත්‍රාත්තුව M/s. Resources Development Consultants (Pvt) Ltd⁣ වෙත රුපියල් මිලියන 356.22 ක ( බදු රහිත ) මුළු මුදලකට ප්‍රදානය කිරීම උපදේශක ප්‍රසම්පාදන කමිටුව විසින් නිර්දේශ කරනු ලැබ තිබේ.

ඒ අනුව, එකී නිර්දේශය පරිදි අදාළ ප්‍රසම්පාදනය පිරිනැමීම පිණිස ප්‍රවාහන, මහා මාර්ග සහ නාගරික සංවර්ධන අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.