(රංජන් කටුගම්පොළ)

පාර්ලිමේන්තු මන්ත්‍රී නාලන්ද එල්ලාවල මහතා ඝාතනය කළ සමයේදී කඩයකට රුපියල් 50,000ක අනර්ථයක් සිදු කිරීමේ චෝදනාවට වරදකරුවන් කරමින් රත්නපුර ප්‍රාදේශීය සභාවේ හිටපු සභාපති සුදත් දිසානායක මහතා ඇතුළු 6 දෙනකුට රත්නපුර මාහධිකරණයෙන් නියම කළ බරපතළ වැඩ සහිත පස් වසරක සිර දඬුවම අනුමත කළ ශ්‍රේෂ්ඨාධිකරණය ඔවුන් විසින් ගොනු කරන ලද අභියාචනා  පෙත්සම ඊයේ (26) නිෂ්ප්‍රභ කිරීමට නියෝග කළේය.

මෙම අභියාචනා පෙත්සම මුර්දු ප්‍රනාන්දු, කුරේ රාජා සහ අචල වෙන්ගප්පුලි යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් හමුවේ සලකා බැලිණි.

මෙම අභියාචනා පෙත්සමේ මෙසේද සඳහන් වේ.

පාර්ලිමේන්තු මන්ත්‍රී නාලන්ද එල්ලාවල ඝාතනය සිදුවූ සමයේදී රත්නපුර ප්‍රදේශයේ කඩයක් කඩා දමා රුපියල් 50,000ක අනර්ථයක් සිදු කිරීමේ චෝදනාව සම්බන්ධයෙන් නීතිපතිවරයා විසින් රත්නපුර මහාධිකරණය හමුවේ නඩුවක් ගොනු කෙරිණි. එම නඩුව විභාගයට ගැනීමෙන් පසු පෙත්සම්කරුවන් අදාළ චෝදනාවට වරදකරුවන් කරමින් ඔවුනට බරපතළ වැඩ සහිතව වසර 5ක සිරදඬුවම් නියම කෙරිණි.

ඉන් අගතියට පත් පෙත්සම්කරුවන් ඊට එරෙහිව අභියාචනාධිකරණයට අභියාචනයක් ඉදිරිපත් කළ අතර එය නිෂ්ප්‍රභ කෙරිණි.