(කේ. බුද්ධික කුමාරසිරි)

රුසියාවේ රැකියා සදහා සදහා පිටත් කරන බවට පවසා රුපියල් කෝටි පහකට වැඩි මුදලක් ලබා ගෙන සැඟව සිටි අධිකරණය කිහිපයකින්  වරෙන්තු 88 ක් ලබා සිටි පුද්ගලයෙකු අත් අඩංගුවට ගත් බව අතුරුගිරිය පොලිසිය පවසයි.

මෙම සැකකරු තවත් පුද්ගලයෙකු හා එක්ව මොරටුව ප්‍රදේශවේ ආයතනයක් පවත්වාගෙන යමින් මෙලෙස රුසියාවේ රැකියා සදහා පිටත් කල හැකි බවට පවසමින් පුද්ගලයින් රවටා මුදල් වංචා කර පලා ගොස් සිටියදී මෙලෙස අතුරුගිරිය ගජබා මාවත ප්‍රදේශයේ කුලී නිවසක සිටියදී අත් අඩංගුවට ගැනීමට හැකි වූ බවද පොලිසිය පවසයි.

සැකකරු වර්ෂ 2023 දී රුසියාවට ගොස් මාස කිහිපයකින් නැවත පැමිණ ඇති බවත් පසුව මොරටුව ප්‍රදේශයේ මෙලෙස රැකියා දෙන බවට පවසා මුදල් වංචා කර ඇති බවට අනාවරණය වූ බවද පොලිසිය පවසයි.

සැකකරු සම්බන්ධයෙන් මොරටුව මහේස්ත්‍රාත් අධිකරණය මගින් වරෙන්තු 72 ක් ද පානදුර මහේස්ත්‍රාත් අධිකරණය සහ ගාල්ල මහේස්ත්‍රාත් අධිකරණය මගින් වරෙන්තු 16 ක්ද නිකුත් කර තිබූ බවද පොලිසිය පවසයි.

මෙලෙස අත් අඩංගුවට ගෙන ඇත්තේ වාද්දුව මාවල මහරැක්ම පාර ප්‍රදේශයේ පදිංචිකරුවකු වන 56 හැවිරිදි  පුද්ගලයෙකි.