(අංජුල මහික වීරරත්න)

මේ මොහොතේ රනිල්ගේ දේශපාලන ආර්ථික සහ ජාත්‍යන්තර පලපුරුද්දෙන් ප්‍රයෝජන නොගත්තොත් ලංකාව අනිවාර්යයෙන්ම යටත් විජිතයක් බවට පත්වන බව එක්සත් ජාතික පක්ෂ සභාපති වජිර අබේවර්ධන මහතා පැවසීය.

අවශ්‍ය කරන්නේ විරුද්ධ පක්ෂයක් ලෙස උද්ඝෝෂණය කිරීම නොවන බව කී වජිර අබේවර්ධන මහතා  බිමට වට්ටන රට ගොඩ නැගීම සඳහා දැන් විපක්ෂයක් අවශ්‍ය කර තිබෙන බව සඳහන් කළේය.

එජාප සභාපතිවරයා මේ බව කීවේ ගාල්ල උළුවිටිකේ එක්සත් ජාතික පක්ෂ දිස්ත්‍රික් කාර්යාලයේ පැවැති මාධ්‍ය හමුව අමතමිනි.

මහජනතාව  සිංහල දෙමළ අවුරුද්ද සැමරීමට කෙසේ හෝ ක්‍රියා කර ති‍බෙනවා. ඒක වැදගත් දෙයක් හැටියටයි අපි දකින්නේ. අපේ චාරිත්‍ර වාරිත්‍ර, අපේ සංස්කෘතිය ආරක්ෂා කිරීම ඉතාම වැදගත්. මොන පීඩනයක් මැද්දේ හරි මහජනයා ඒ පණිවිඩය රජයට ලබා දී තිබෙනවා. 

ඒ කියන්නේ රජය සංස්කෘතික කටයුතු සහ ආගමික කටයුතු සම්බන්ධයෙන් ක්‍රියා නොකළත් රජයට මහජන වටිනාකම් පාලනය කිරීමට බැහැ. මහජනයා  කණකර උකස් තියලා හරි අවුරුදු සැමරුම් සිදු කරනවා. 
එය ශ්‍රී ලාංකිකයන් හැටියට ඉතාම ආඩම්බර වෙන්න ඕන අවස්ථාවක් යනුවෙන්ද වජිර අබේවර්ධන මහතා කීය.