(අංජුල මහික වීරරත්න)

ශ්‍රී ලංකාවේ තෙදින නිල සංචාරයක නිරත එක්සත් ජාතීන්ගේ ළමා අරමුදලේ (UNICEF) විධායක මණ්ඩල නියෝජිත පිරිස අග්‍රාමාත්‍ය ආචාර්ය හරිනි අමරසූරිය අරලියගහ මන්දිරයේදී හමුවිය.

නියෝජිත පිරිස පිළිගත් අග්‍රාමාත්‍ය ආචාර්ය හරිනි අමරසූරිය, දරුවන්ගේ අයිතිවාසිකම් සහ යහපැවැත්ම ප්‍රවර්ධනය කිරීම සඳහා යුනිසෙෆ් සංවිධානය විසින් ශ්‍රී ලංකාවට ලබාදෙන සහායට කෘතඥතාව පළ කළ අතර දිට්වා සුළි කුණාටුවෙන් පසු යුනිසෙෆ් සංවිධානය විසින් කඩිනමින් ලබාදුන් සහන සහ ප්‍රතිසාධන පැසසුමට ලක් කළාය.

දරුවන් සඳහා වන නීතිමය ආරක්ෂාව තවදුරටත් ශක්තිමත් කිරීම, දරුවන්ට එරෙහි සියලු ආකාරයේ හිංසනයන් වැළැක්වීම සහ ළමා මන්දපෝෂණය පිළිබඳ පවතින ගැටලු විසඳීම සම්බන්ධයෙන් සාකච්ඡා කෙරිණි.

මෙම සාකච්ඡාව දෙපාර්ශ්වය අතර සහයෝගීතාව තවදුරටත් ශක්තිමත් කර ගැනීම සඳහා වටිනා අවස්ථාවක් බව පෙන්වා දුන් අග්‍රාමාත්‍යවරිය ශ්‍රී ලංකාව සතුව ශක්තිමත් ප්‍රතිපත්තිමය සහ නීතිමය රාමුවක් පවතින නමුත්, දරුවන් සහ අවදානමට ලක් වූ කණ්ඩායම් මුහුණදෙන අභියෝගවලට විසඳුම් ලබාදීමේදී එම ප්‍රතිපත්ති සහ නීති ඵලදායී ලෙස ක්‍රියාත්මක කිරීම සහ බලාත්මක කිරීම කෙරෙහි වැඩි අවධානයක් යොමු කළ යුතු බව ද අවධාරණය කළාය.