(අංජුල මහික වීරරත්න)

ශක්තිමත් රාජ්‍ය සේවාවක් ස්ථාපිත කිරීමට  පනත් වල තිබෙන යල් පැන ගිය  තත්ත්වයන්  කඩිනමින් වෙනස් කළ යුතු බව සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතා පැවසීය.

සෞඛ්‍ය ක්ෂේත්‍රයේ සෑම වෘත්තියකටම අයත් වෘත්තිකයන් සෞඛ්‍ය අමාත්‍යාංශයේ තීන්දු තීරණ ගන්නා ස්ථාන වල සිටිය යුතු බවද අමාත්‍යවරයා කීය.

ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ  90 වන සංවත්සරය අමතමින් අමාත්‍යවරයා මේ බව කීය. කඩවත, “රෝස් ගාඩ්න්” උත්සව ශාලාවේ දී මෙය පැවැත්විණි.

දීර්ඝ කාලයක් මහජන සෞඛ්‍ය පරීක්ෂකවරුන් ලෙස සේවය කළ නිලධාරීන් මෙහිදී අගය කිරීමට ලක් කළ අතර ඔවුන් හට සමරු තිළිණ ද අමාත්‍යවරයාගේ සහභාගීත්වයෙන් ප්‍රදානය කරන ලදී.

එමෙන් ම ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ   Voice of Public Health, face book පිටුව සහ youtube නාලිකාව ද අමාත්‍යවරයා විසින් මෙහි දී  එළිදක්වන ලදී.

මෙහි දී අදහස් දක්වමින් සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙරට ක්‍රියාත්මක නිදහස් සෞඛ්‍ය සේවාව මෙහෙයවීමේ දී එහි දිශානතියේ  යම් වෙනසක් සිදුකළ යුතු බව පැවැසීය.