(අංජුල මහික වීරරත්න සහ සුජිත් හේවාජුලිගේ)

යුක්‍රේන ප්‍රශ්නය ඇතිවූ අවස්ථාවේදී  ජනාධිපතිවරයා ක්ෂණිකව ඒ සම්බන්ධව ප්‍රතිචාර දැක් වූ ලෙසින් පලස්තීන  ප්‍රශ්නයේදීත් විවෘත හා පැහැදිලි ස්ථාවරයක් ගත යුතුව තිබෙන බව සමගි ජන බලවේගයේ මන්ත්‍රී ඉමිතියාස් බාකීර් මාකර් මහතා පාර්ලිමේන්තුවේ දී පැවසීය.

අද පලස්තීන ප්‍රශ්නයේ හරි වැරැද්ද  කළු සුදු මෙන් පැහැදිලි තත්වයක් බවද මන්ත්‍රීවරයා කීය.

යුක්‍රේන ප්‍රශ්නයේදී අනුගමනය කළ සිද්ධාන්ත,මූලධර්ම අනුව යමින් ජනපති  විවෘත හා පැහැදිලි ස්ථාවරයක් ගත යුතුව තිබෙන බවද බාකීර් මාකර් මහතා පැවසීය.

නිවැරදි පාර්ශවය වෙනුවෙන් පෙනී සිටිමින් මිනිස් සංහාරය වහාම නතර කිරීමටත් කොන්දේසි විරහිතව වහාම සටන් විරාමයකට යාමටත්  පැහැදිලිව හඬ නැගිය යුතුව තිබෙන බවද මන්ත්‍රීවරයා කීය.

මාස දෙකකට අධික කාලයක් තිස්සේ පලස්තීන භූමියට ඊශ්‍රායල ගුවන් හමුදාව බෝම්බ දමමින් සිටින බවත්  ගාසාවේ උතුරේ සිටින  පලස්තීනුවන්ට උපන් ගම්බිම්, වාසස්ථාන අත්හැර ජීවිත බේරාගෙන දකුණට යන්නැයි නිවේදනය කර තිබෙන බවත් ඉමිතියාස් බාකීර්  මාකර් මහතා කීය. පාසල්, රෝහල්, වාසස්ථාන, ඉස්ලාමීය, ක්‍රිස්තියානි සියලු දේවස්ථාන භේදයකින් තොරව පොලවට සමතලා වී ඇතැයි ද මන්ත්‍රීවරයා කීය.

මෙහිදී අදහස් දක්වමින් විදේශ අමාත්‍ය අලි සබ්රි මහතා පැවසූයේ රජයක් ලෙස පලස්තීන ජනතාව වෙනුවෙන් ලංකාව  පෙනී සිටින බවයි.ජනාධිපති රනිල් වික්‍රමසිංහ මහතා ද එක්සත් ජාතීන්ගේ සංවිධානයේ දී එම ස්ථාවරය පැහැදිලිවම ප්‍රකාශ කර තිබෙන බවද විදේශ අමාත්‍යවරයා සඳහන් කළේය.