(විමුක්ති එස් රුද්‍රිගු)

රුසියානු හමුදා පාලනය යටතේ පවතින දකුණු යුක්රේනයේ කකොව්කා ජල විදුලි බලාගාරයේ වේල්ල අද උදෑසන පුපුරා ගොස් ඇතැයි රුසියන් ටුඩේ වෙබ් අඩවිය වාර්තා කර ඇත.

වේල්ල පුපුරා යාම හේතුවෙන් නෝවා කකොව්කා නගරය ජලයෙන් යටවී තිබේ.තවමත් එම නගරයේ මීටර් 11 ක ජල මට්ටමක් තිබෙන බව රුසියන් ටුඩේ පුවත් සේවය පෙන්වා දී ඇත.

වේල්ල පුපුරා ගිය අවස්ථාවේ ඉන් පහළ ප්‍රදේශයේ දිනිප්‍රෝ ගංගාව දෙපස ජීවත් වූ ජනතාවට තම ජීවිත බේරා ගැනීම සඳහා හැකි සෑම දෙයක්ම සිදුකරන ලෙස නිවේදනයක්ද නිකුත් කිරීමට කර්සන් හි හමුදා පාලන අධිකාරිය කටයුතු කළේය.

කකොව්කා ජල විදුලි බලාගාරය ඉදිකර ඇත්තේ යුක්රේනයේ විශාලතම ජලාශය ආශ්‍රිතවය.

වේල්ල පුපුරා යාම හේතුවෙන් දවස් 4 ත් 5 ත් අතර කාලයක් ජල ධාරාවක් පහළට ගලා එනු ඇති බවත් ඉන් නගර 80 වක් පමණ ජලයෙන් යටවිය හැකි බවත් යුක්රේන බලධාරීන් ප්‍රකාශ කර ඇත.

රුසියානු හමුදා පාලනය යටතේ පවතින මෙම විදුලි බලාගාරයේ වේල්ල පුපුරුවා හැර ඇත්තේ රුසියානු හමුදාව විසින් යැයි යුක්රේන බලධාරීන් චෝදනා කර තිබේ.

ශ්‍රී ලංකාවේ රුසියානු තානාපති කාර්යාලය මේ පිළිබඳව නිවේදනයක් නිකුත් කරමින් ප්‍රකාශ කර සිටියේ යුක්රේන හමුදා එල්ල කළ ෂෙල් වෙඩි ප්‍රහාරයකින් වේල්ල පුපුරා ගිය බවත් මෙය යුක්රේන හමුදාවේ ත්‍රස්තවාදී ප්‍රහාරයක් බවත්ය.