(ඩයනා උදයංගනී සහ ආරියරත්න රණබාහු)

හිටපු යුද හමුදාපති ජෙනරාල් මහේෂ් සේනානායක මහතා නාරාහේන්පිට යුද හමුදා රෝහලේ ප‍්‍රතිකාර ලබමින් සිට පැය දෙකක කාලයක් අවසර ලබාගෙන පැමිණ මීට සුළු මොහොතකට පෙර සිය ජනාධිපතිවරණ ප‍්‍රතිපත්ති ප‍්‍රකාශය එළිදැක්වීය.

ජාතික ජනතා පක්ෂයේ ජනාධිපති අපේක්‍ෂක, හිටපු යුද හමුදාපති ජෙනරාල් මහේෂ් සේනානායක මහතාගේ ප‍්‍රතිපත්ති ප‍්‍රකාශය එළිදැක්වීම කොළඹ, ශ්‍රී ලංකා පදනම් ආයතනයේදී සිදුකෙරිණි.

එම ප‍්‍රතිපත්ති ප‍්‍රකාශය හිටපු යුද හමුදාපතිවරයා විසින් පළමුව මහා සංඝරත්නය වෙත පිළිගැන්වීම සිදුකෙරිණි.

උණ රෝගය වැළඳී තිබුණත් එය ගණනකට නොගෙන මැතිවරණ කටයුතුවල නිරත වීම නිසා පසුගිය දිනෙක බලංගොඩ රෝහලට ඇතුළත් වීමට තමාට සිදුවූ බව මෙහිදී පැවසූ හිටපු යුද හමුදාපතිවරයා ඉන්පසු මේ වන තුරුත් යුද හමුදා රෝහලේ ප‍්‍රතිකාර ලබමින් සිටින බව සඳහන් කළේය.

එසේ වුවත් රට වෙනුවෙන් ගත් තීරණය ඉදිරියට ගෙන යා යුතු නිසා පැය දෙකකට අවසර ලබාගෙන ප‍්‍රතිපත්ති ප‍්‍රකාශය එළිදැක්වීමේ අවස්ථාවට පැමිණි බවද හෙතෙම කීවේය.

එක රටක්, එක නීතියක්, එක දැයක් යන්න තම ප‍්‍රතිපත්ති ප‍්‍රකාශයේ එන ප‍්‍රධානම කරුණ බව කී ජෙනරාල් මහේෂ් සේනානායක මහතා රට තුළ විනයක් ඇති දේශපාලනයක් හා ආර්ථික සංවර්ධනයක් ඇතිකිරීම ඇතුළු සියලූ අරමුණු ඉටුකරගැනීමට අවශ්‍ය වැඩපිළිවෙල එහි ඇතුළත් බව ද පැවසීය.

(ඡායාරූප - ලහිරු හර්ෂණ)