(විමුක්ති එස් රුද්‍රිගු)

තම සේවකයින්ගේ වැටුප් වැඩිකිරීම හේතුවෙන් ඇති වූ අර්බුදකාරී තත්ත්වය හමුවේ තමා මහ බැංකු අධිපති ධුරයෙන් ඉවත් නොවන බව ආචාර්ය නන්දලාල් වීරසිංහ මහතා අද (26) පැවැති මාධ්‍ය හමුවකදී ප්‍රකාශ කළේය.

කෙදිනක හෝ තමා තනතුරෙන් ඉවත් වන්නේ තනතුරෙන් රටට ඉටුවිය යුතු දේ ඉටු කිරීමට නොහැකි වුවහොත් පමණක් බව ආචාර්ය නන්දලාල් වීරසිංහ මහතා එහිදී පැවැසුවේය.මහ බැංකු සේවකයින්ගේ වැටුප් වැඩිකිරීම හා නැවත සලකා බැලීම හේතුවෙන් තමන් කිසිම විටක රැකියාවෙන් ඉවත් නොවන බව ආචාර්ය විරසිංහ මහතා ප්‍රකාශ කළේය.

ආයතනයේ ප්‍රධානියා ලෙස සේවකයින්ගේ වැටුප් වැඩිකිරීම සම්බන්ධයෙන් වගකීමක් තමන්ට තිබෙන බවත් එය ඉවත් වීමට හේතුවක් ලෙස තමන් නොදකින බවත් මහ බැංකු අධිපතිවරයා එහිදී පැවැසුවේය.

පරටේ නිතිය ක්‍රියාත්මක කිරීම අත්හිටුවීම තුළින් බැංකු ණය දීම තවදුරටත් අදිමදි කරනු ඇතැයි මහ බැංකු අධිපතිවරයා ප්‍රකාශ කළේය.බැංකුව ණය ලබා දෙන්නේ තැන්පත්කරුවන්ගේ මුදල් වලින් බැවින් එය අය කරගැනීමේදී බාධාවක් තිබේ නම් කුඩා සහ මාධ්‍ය පරිමාණ ව්‍යවසායකයන්ට ණය දීමේදී බැංකු මීට වඩා පරිස්සම් වනු ඇතැයි මහ බැංකු අධිපතිවරයා ප්‍රකාශ කළේය.

එහිදී පරටේ නිතිය ක්‍රියාත්මක කිරීම අත්හිටුවීම සුළු හා මධ්‍ය පරිමාණ පහසුවක් නොව අපහසුවක් වනු ඇතැයි ආචාර්ය නන්දලාල් වීරසිංහ මහතා ප්‍රකාශ කළේය.

විශාල වශයෙන් පවතින පොලී අනුපාතික අඩු කිරීම සඳහා 2023 අගෝස්තු මස ගනු ලැබූ නියාමන ක්‍රියාමාර්ගය අහෝසි කිරීමට පියවර ගන්නා බවත් ඉන් කිය වෙන්නේ නියාමන ක්‍රියාමාර්ගය හරහා අඩු වූ ප්‍රමාණයට වඩා තවදුරටත් අඩුවීමේ අවශ්‍යතාවය බව ශ්‍රී ලංකා මහ බැංකුවේ ආර්ථික පර්යේෂණ නියෝජ්‍ය අධ්‍යක්ෂක ජානක එදිරිසිංහ මහතා පැවැසුවේය.

2023 ජනවාරි මාසයේදී නිත්‍ය පහසුකම් ලබා ගැනීම සඳහා වාණිජ බැංකුවලට පැනවූ සීමාව ලබන පළමු වැනිදා සිට ඉවත් කිරීමට පියවර ගන්නා බව එදිරිසිංහ මහතා ප්‍රකාශ කළේය.