(අංජුල මහික වීරරත්න)

ඓතිහාසික කන්ද උඩරට ඇසළ පෙරහර මංගල්‍යය - 2026 සංවිධාන කටයුතු පිළිබඳව සහ එහි ප්‍රගතිය සම්බන්ධයෙන් වන සාකච්ඡාවක් ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙන් ජනාධිපති කාර්යාලයේදී අද (24) පැවැත්විණි.

ඓතිහාසික කන්ද උඩරට ඇසළ පෙරහර මංගල්‍යය උත්කර්ෂවත්ව සහ අභිමානවත් අන්දමින් පැවැත්වීමට රාජ්‍ය මැදිහත් වීම, සහාය ලබා ගැනීම පිළිබඳව සහ ඊට අදාළ පෙර සූදානම මෙන්ම පෙරහර සංවිධාන කටයුතුවල වත්මන් ප්‍රගතිය සම්බන්ධව මෙහිදී දීර්ඝ ලෙස සාකච්ඡා විය.

පෙරහර මංගල්‍යය සාර්ථක කර ගැනීමට අනුග්‍රහය දක්වන සියලුම රාජ්‍ය ආයතන සහ මූල්‍යමය අනුග්‍රහය දක්වන රාජ්‍ය සහ පෞද්ගලික ආයතන විසින් ඊට ලබා දෙනු ලබන දායකත්වය පිළිබඳවද මෙහිදී සාකච්ඡා කෙරිණි.

පෙරහර නැරඹීමට පැමිණෙන බැතිමතුන්ට අවශ්‍ය ජලය, විදුලිය, සනීපාරක්ෂක, ප්‍රවාහන කටයුතු ඇතුළු පහසුකම් සැලසීම සහ පෙරහරට අලි ඇතුන් ලබා ගැනීම කෙරෙහිද මෙහිදී විශේෂයෙන් අවධානය යොමු විය.

මහනුවර ඇසළ පෙරහර මංගල්‍යය ඉතා සාර්ථකව පැවැත්වීමට අවශ්‍ය උපරිම සහාය සහ මැදිහත් වීම රජය ලබා දෙන බව ජනාධිපති ලේකම් ආචාර්ය නන්දික සනත් කුමානායක මහතා සඳහන් කළේය.

මෙවර කුඹල් පෙරහර මංගල්‍යය අගෝස්තු මස 18වෙනි දා සිට 22වෙනි දා දක්වා පැවැත්වීමට නියමිත අතර, රන්දෝලි පෙරහර මංගල්‍යය අගෝස්තු මස 23වෙනි දා සිට පැවැත්වේ. අවසන් මහා රන්දෝලි පෙරහර 27වෙනි දා රාත්‍රී වීථි සංචාරය කෙරේ. අනතුරුව අගෝස්තු 28වෙනි දින අලුයම දිය කැපීමේ චාරිත්‍රය සිදු කිරීමෙන් පසු, එදින දහවල් පෙරහර වීදි සංචාරය කිරීමෙන් මෙවර ඇසළ පෙරහර මංගල්‍යය නිමාවට පත් වේ.

ශ්‍රී දළදා මාළිගාවේ දියඩවන නිලමේ ප්‍රදීප් නිලංග දෑල, මධ්‍යම පළාත් ආණ්ඩුකාර ලේකම් ඉෂාන් විජේතිලක, ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ, මධ්‍යම පළාත් ප්‍රධාන ලේකම් ජී. එච්. එම්. ඒ. ප්‍රේමසිංහ, බෞද්ධ කටයුතු කොමසාරිස් ජනරාල් ගාමිණී සේනාරත්න, ආරක්ෂක අමාත්‍යාංශයේ අතිරේක ලේකම් හර්ෂ විතානආරච්චි, මහනුවර දිස්ත්‍රික් ලේකම් ඉන්දික උඩවත්ත, මධ්‍යම පළාත් අධ්‍යාපන ලේකම් මධුපානී පියසේන, මහනුවර ප්‍රාදේශීය ලේකම් අමිල නවරත්න, මහනුවර නාගරික කොමසාරිස් ඉන්දිකා කුමාරි යන මහත්ම මහත්මීහුද, රාජ්‍ය ආයතනවල නිලධාරීහු, අනුග්‍රාහක සමාගම්වල නිලධාරීහුද, ආරක්ෂක අංශවල ජ්‍යෙෂ්ඨ නිලධාරීන් ඇතුළු පිරිසක්ද මෙම අවස්ථාවට එක්ව සිටියහ.