(හේමන්ත රණසූරිය)

පදවිය මුල්මුඩේ ප්‍රදේශයේ ගොවි මහතකු තම පුතුගේ විවාහ මංගල උත්සවය මහා වනාන්තරයක් මැද ඊයේ (21) පවත්වා ඇත.

පදවිය – පුල්මුඩේ මාර්ගයේ ඌරුව ප්‍රදේශයේ සිට කිලෝමීටර් දෙකක් පමණ වන මැද පිහිටි කොහොඹපිටිය වැව පාමුල මනස්කාන්ත පරිසරයක සැකසූ පෝරුව, මනාල යුවළ වාඩිවන පුටුව ද වනාන්තරයෙන් සොයාගත් අමුද්‍රව්‍යවලින් අලංකාරව සකසා තිබිණි.

මනාල යුවළ වූයේ ශ්‍රීපුර පදිංචි නදුන් චතුරංග සහ කොලොංගොල්ලේ රජුනිකා දසාංජලී ය.

මෙම මංගල උත්සවයේදී කන පැලෙන සංගීතයක් නොතිබිණි. ඩොල්කිය, තබ්ලාව සහ සර්පිනාව උපයෝගී කර ගනිමින් මිහිරි වූ සංගීත රාවයක් වනය සිසාරා ගලා ගියේය.

වනාන්තරයට පණ මෙන් ඇල්මක් දක්වන ගොවිතැනින් ජීවත් වන මනාලයාගේ පියා වන සමන්ත ප්‍රේමලාල් තම පුතුගේ මංගල උත්සවය මේ ආකාරයෙන් මහ වන මැද පැවැත්වීමට කටයුතු කළේය.

මේ සම්බන්ධයෙන් ඔහු කියා සිටියේ සොබාදහම අපට දී තිබෙන දායාදවලට පයින් ගසා සරුව පිත්තල ලෝකවල ජීවත්වන මිනිසුන්ට ආදර්ශයක් ලෙස මෙම උත්සවය සංවිධානය කළ බවය.

වනාන්තරයට කිසිදු හානියක් නොවන ආකාරයට මෙය සංවිධාන කළ බව ද ඔහු කියා සිටියේය. මෙම මංගල උත්සවයට දෙපාර්ශ්වයේම ඥාතීහු 300ක් පමණ දෙනා සහභාගි වූහ.