(බිඟුන් මේනක ගමගේ)

මුස්ලිම් විවාහ හා දික්කසාද නීතිය ස්ත්‍රී පුරුෂ භේදයකින් තොරව ක්‍රියාත්මක කිරීමට නීති සංශෝධන කළ යුතු යැයි මුස්ලිම් පුද්ගලික නීති ප්‍රතිසංස්කරණ ක්‍රියාකාරී කණ්ඩායමේ (MPLRAG) සාමාජිකා නීතිඥ අර්මීසා ටීගල් මෙනෙවිය කොළඹ පැවැති සම්මන්ත්‍රණයකදී අද(6) පැවැසීය.

දැනට මෙරට ක්‍රියාත්මක මුස්ලිම් විවාහ හා දික්කසාද පනතේ කාන්තාවන්ට වෙනස් ලෙස සලකන විධිවිධාන අන්තර්ගතව ඇතැයි ද කාදි උසාවිවල විනිශ්චයකාර, විවාහ රෙජිස්ට්‍රාර්, ජූරි සභික යන තනතුරු හා කාදි මණ්ඩලයේ තනතුරු දැරීම පුරුෂයන්ට පමණක් සීමා කිරීම ඊට හොඳම නිදසුනක් යැයි නීතිඥ ටීගල් මෙනෙවිය කීවාය. 

කොළඹ 08, කින්සි ටෙරස්හි පිහිටි ජනවාර්ගික අධ්‍යයනය සඳහා වූ ජාත්‍යන්තර මධ්‍යස්ථානයේදී මෙම සම්මන්ත්‍රණය පැවැත්විණි. 

මුස්ලිම් දැරියන්ට හා කාන්තාවන්ට සමාජයෙන් මෙන්ම රාජ්‍යයෙන් ද සහනයක් නැති වීම හේතුවෙන් ඔවුන් තෙවැනි ගනයේ පුරවැසියන්ගේ තත්ත්වයට වැටී ඇතැයි කී ඇය ප්‍රධාන ප්‍රවාහයේ සිටින දේශපාලන නායකයන් මුස්ලිම් කාන්තාවන්ගේ හඬට සවන් නොදෙන්නේ තම ඡන්ද පදනම් රැක ගැනීමට යැයි චෝදනා කළාය.

මුස්ලිම් කාන්තාව බලගැන්වීම සිය පක්ෂ බල ව්‍යාපෘති ක්‍රියාත්මක කිරීමට ප්‍රශ්නයක් වනු ඇතැයි ප්‍රධාන පක්ෂ කල්පනා කරන්නේ යැයි ද ටීගල් මෙනෙවිය පැවසුවාය.

මුස්ලිම් විවාහ දික්කසාද නීතිය සඳහා දැනට ඇති පෙළඹවීම පාස්කු ඉරිදා ප්‍රහාරයෙන් පසුව හදිසියේ හටගත්තක් යැයි ද එහි ප්‍රතිසංස්කරණ ප්‍රවේශය අත්තනෝමතික හා වැරැදි මතවාද මත පදනම්ව ඇතැයි ද නීතිඥ ටීගල් මෙනෙවිය වැඩිදුරටත් සඳහන් කළාය.