(සුජිත් හේවාජුලිගේ )

පේරාදෙණිය විශ්ව විද්‍යාලයේ හිටපු  උප කුලපති මහාචාර්ය  උපුල් දිසානායක මහතා සමගි  ජන බලවේගයේ   මධ්‍යම පළාත් මහ ඇමති ධුර  අපේක්ෂක ලෙස පත් කරන ලෙස  එම පළාතේ පක්ෂ  ප්‍රබලයන් රැසක් නායකත්වයෙන්  ඉල්ලීම් කර ඇතැයි වාර්තාවේ.

දිසානායක මහතා මධ්‍යම පළාත් මහ ඇමැති ධුරයට පත් කිරීමට සියලුම ආසන සංවිධායකවරුන්ගේ ආශිර්වාදය ලැබී ඇතැයි දේශපාලන ආරංචි මාර්ග සඳහන් කළේය.

ගලගෙදර  සජබ  ආසන සංවිධායකවරයා ලෙස   කටයුතු කරන  උපුල් දිසානායක මහතා එම පක්ෂය සමග දීර්ඝ කාලීනව දේශපාලන කටයුතුවල නියැලී සිටින විද්වතෙකි.

සජබ  නායකත්වය ඔහු විශ්ව විද්‍යාල සේවයේදී සිටියදී මහ ඇමති අපේක්ෂක ධූරයට පත්කිරීමට උත්සාහ දැරූ අවස්ථාවේදී එම ඉල්ලීම  ප්‍රතික්ෂේප කර තිබිණ. දැනට සේවයෙන් විශ්‍රාම ගොස් සිටින හෙයින් ඒ ඉල්ලීමට ඔහු කැමැත්ත පලකර ඇති බව දැනගන්නට ඇත.

මහාචාර්ය උපුල් දිසානායක මහතා පේරාදෙණිය විශ්ව විද්‍යාලයේ 21 වැනි උපකුලපතිවරයාය.ඔහු   එහි දන්ත වෛද්‍ය පීඨයේ  පීඪාධිපතිවරයා  ලෙසද  කාලයක් කටයුතු කළේය.

දූෂණ චෝදනා නැති චරිතවත් පුද්ගලයෙකු මහ ඇමති අපේක්ෂක ධුරයට පත් කිරීම මේ අවස්ථාවේ ඉතා වැදගත් බව ආසන සංවිධායකවරු එක හඬින් කියා සිටිති.