(මනෝප්‍රිය ගුණසේකර)

බුස්ස අධිආරක්ෂිත බන්ධනාගාරයේ අභ්‍යන්තර පරීක්ෂා කිරීම් වැනි  කටයුතුවලින් පොලිස් විශේෂ කාර්ය බළකායේ නිලධාරීන් ඉවත් කරන්නැයි ඉල්ලා ප්‍රබල පාතාල කල්ලි නායකයකු බව කියන මිදිගම රුවන් නමැත්තා ගොනු කර තිබූ පෙත්සම විභාගයට නොගෙනම අභියාචනාධිකරණය අද (04) නිෂ්ප්‍රභ කළේය

පෙත්සම පවත්වාගෙන යෑමට නොහැකි බවට නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතීඥ ශනිල් කුලරත්න මහතා මතු කළ මුලික විරෝධතාවයක් පිළිගත් අභියාචනාධිකරණය එලෙස නියෝග කළේය.

අභියාචනාධිකරණ සභාපති විනිසුරු රොහාන්ත අබේසූරිය සහ ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඩුල්ල හමුවේ විභාගයට ගත් පෙත්සමේ නියෝගය ප්‍රකාශයට පත් කරමින් එලෙස නියෝග කළේය.

පෙත්සමේ සඳහන් නඩු නිමිත්ත තහවුරු කිරීමට තරම් ප්‍රමාණවත් කරුණු ඉදිරිපත් කිරිමට පෙත්සම්කරු අසමත් වී ඇති බව නියෝගය ප්‍රකාශයට පත් කරමින් සඳහන් කළ විනිසුරු මඩුල්ල පෙත්සම විභාගයට නොගෙනම නිෂ්ප්‍රභ කළේය.

බූස්ස බන්ධනාගාරයේ රැඳවියන් පරීක්ෂා කිරීම් ඇතුළු අභ්‍යන්තර කටයුතු සඳහා පොලිස් විශේෂ කාර්ය බළකායේ නිලධාරීන් යොදවා ගැනීම බන්ධනාගාර පනතේ විධිවිධාන වලට පටහැනි බව පෙන්වාදෙන පෙතසම්කරු ඒ අනුව බන්ධනාගාරයේ අභ්‍යන්තර කටයුතු සඳහා පොලිස් විශේෂ කාර්ය බළකායේ නිලධාරීන් යොදවා ගැනීම වළක්වාලන නියෝගයක් නිකුත් කරන්නැයි ඉල්ලා තිබිණී.