රුසියාවට අයත් ටැටර්ස්ථාන් පළාතේ, කසාන් නගරයේ දී, රුසියන් ජනාධිපති ව්ලැදිමිර් පුටින්ගේ ප්‍රධානත්වයෙන්, බ්‍රික්ස් රාජ්‍ය නායක සමුළුව අද ඇරැඹේ. සමුළුව දින දෙකක් පුරාවට පැවැත්වෙයි.

බ්‍රික්ස් යනු බ්‍රසීලය, රුසියාව, ඉන්දියාව, චීනය සහ දකුණු අප්‍රිකාව එක් වී, බටහිර රටවලින් එල්ල වන ආර්ථික සහ වෙළෙඳ අභියෝග හමුවේ පිහිටුවාගත් සංවිධානයකි. 

මෙම 2024 වසර වෙද්දී, ඊජිප්තුව, ඉරානය, එක්සත් අරාබි එමිරේට්ස් රාජ්‍යය, සේදි අරාබිය සහ ඉතියෝපියාව ද සාමාජිකත්වය හිමි රටවල් ලෙස බ්‍රික්ස්හවුලට එක් වී සිටී.

හදිසි අනතුරකින් තුවාල ලබා සිටින බ්‍රසීල ජනාධිපති ලූලා ද සිල්වා සහ සෞදියේ ඔටුන්න හිමි සල්මාන් කුමරුන් හැර, සෙසු සෑම රටකම රාජ්‍ය නායකයෝ, විදේශ අමාත්‍යවරු සහ නියෝජිතයෝ කසාන් නගරයට පැමිණියහ.

ඔවුන් සියලු දෙනා උණුසුම් ලෙස පිළිගනු ලැබුවේ රුසියන් ජනාධිපති ව්ලැදිමීර් පුටින් විසිනි.

සල්මාන් කුමරු වෙනුවට සමුළුවට සහභාගී වන්නේ සෞදි විදේශ අමාත්‍යවරයාය. සෞදිය ලොව විශාලතම තෙල් අපනයනකරුවාය.

ඉන්දීය අග්‍රාමාත්‍ය නරේන්ද්‍ර මෝදි ද සමුළුවට එක් වන අතර මෝදි රුසියාවට ගියේත්, සමුළුව අතරතුරේ රුසියන් ජනාධිපති පුටින් හමුවන්නේත් මාස කීපයක් ඇතුළත දෙවැනි වරට වීම විශේෂත්වයකි.

රුසියන් යුක්රේන යුද්ධය සම්බන්ධයෙන් ඊට මැදිහත් වී සාම වැඩසටහනක් ඉදිරිපත් කිරීමට මෝදි ප්‍රමුඛ ඉන්දීය රජය සූදානම් වෙයි.

එම සාම වැඩපිළිවෙළ සම්බන්ධයෙන් මෝදි සහ පුටින් අතරේ සාකච්ඡා වනු ඇතැයි ද පැවැසෙයි. අග්‍රාමාත්‍ය මෝදි පුටින් සමඟ පමණක් නොව, යුක්රේන ජනාධිපති ව්ලොදිමීර් සෙලෙන්ස්කී සමඟ ද යහපත් සබඳතා පවත්වයි.

(ඒ.එෆ්.පී.)