(ශ්‍රීනාත් ප්‍රසන්න ජයසූරිය)

මනුෂ්‍ය ඝාතනයක ප්‍රධාන සැකකාරිය සහ මත්ද්‍රව්‍ය ජාවාරම් කාරියක බව කියන කාන්තාවක සමග සෙවනගල ප්‍රදේශයේ පිහිටි හෝටලයක මිතුරන් තිදෙනකු සමඟ නවාතැන් ගෙන සිටියේ යැයි කියන සහකාර පොලිස් අධිකාරිවරයකු සම්බන්ධයෙන් විශේෂ රහස් පොලිස් කණ්ඩායමක් පුළුල් පරීක්ෂණයක් ආරම්භ කර ඇත.

පොලිස්පති සී.ඩී.වික්‍රමරත්න මහතාගේ නියෝගයක් අනුව මෙම සහකාර පොලිස් අධිකාරීවරයා සම්බන්ධයෙන් පුළුල් විමර්ශනයක් පැවැත්වීමට එම විශේෂ රහස් පොලිස් කණ්ඩායම එම ප්‍රදේශයට ගොස් ඇතැයි පොලිස් පොලිස් මූලස්ථාන ආරංචි මාර්ග පවසයි.

එම සහකාර පොලිස් අධිකාරීවරයා මොණරාගල පොලිස් කොට්ඨාසයේ රාජකාරි කරන නිලධාරියෙකි.

මත්ද්‍රව්‍ය ජාවාරමක් සම්බන්ධයෙන් හටගෙන තිබූ බවට පැවසෙන ආරවුලක් මත පසුගිය මැයි මස හත් වැනිදා හම්බන්තොට ප්‍රදේශයේ දී පුද්ගලයකු කපා කොටා ඝාතනය කර තිබිණි.

මෙම ඝාතනය සම්බන්ධයෙන් පුද්ගලයන් දෙදෙනකු තංගල්ල කොට්ඨාස අපරාධ විමර්ශන අංශයේ නිලධාරීන් කණ්ඩායමක්  සැකපිට අත්අඩංගුවට ප්‍රශ්න කිරීමේදී මෙම මනුෂ්‍ය ඝාතනයෙ ප්‍රධාන සැකකාරිය ලෙස කාන්තාවක් ගැන තොරතුරු අනාවරණය වී ඇතැයි පොලිස් ආරංචි මාර්ග කියයි.

ඝාතනයට ලක්වූ පුද්ගලයා සහ මෙම කාන්තාව අතර මත්ද්‍රව්‍ය ජාවාරමක් සම්බන්ධයෙන් ආරවුලක් හටගෙන තිබූ බවට ද බවට ද පොලිසියට තොරතුරු හෙළිකර ගැනීමට හැකිවී ඇත.

මෙම සැකකාරිය සෙවනගල ප්‍රදේශයේ හෝටල් කාමරයක නවාතැන් ගෙන සිටින බවට ලද තොරතුරක් අනුව තංගල්ල කොට්ඨාශ අපරාධ විමර්ශන අංශයේ නිලධාරීන් කණ්ඩායමක් එම හෝටලය වැටලූ අවස්ථාවේ අවශ්‍ය සිටි එම සැකකාර කාන්තාව සමග සහකාර පොලිස් අධිකාරිවරයකු සහ ඔහුගේ මිතුරන් බව කියන පුද්ගලයන් තිදෙනකු ද එම හෝටල් කාමරේ සිට ඇතැයි පොලිස් ආරංචි මාර්ග වලින් දැනගැනීමට තිබේ.

මනුස්ස ඝාතනයට සොයමින්  සිටි කාන්තාව සැකපිට අත්අඩංගුවට ගෙන සහකාර පොලිස් අධිකාරිවරයා ගේ මිතුරන් යැයි පැවසූ පුද්ගලයන් තිදෙනාත් ඔවුන් පැමිණියේ යැයි  කියන ප්‍රාඩෝ වර්ගයේ ජීප්රථය සමඟ පොලිස් භාරයට ගනු ලැබූහ.

පොලිස් ප්‍රශ්න කිරීම්වලින් පසු සහකාර පොලිස් අධිකාරීවරයාගේ මිතුරන් යැයි පැවසූ පුද්ගලයන් තිදෙනා සහ පොලිස් භාරයට ගත් ජීප් රථය ද මුදාහැර ඇත.

වැටලීමට ගිය පොලිස් නිලධාරීන් කණ්ඩායම මෙම තොරතුරු සියල්ල ප්‍රදේශයේ උසස් පොලිස් නිලධාරීන්ට දැනුම් දීමෙන් පසු මේ බව පොලිස්පතිවරයාට ලිඛිතවම දැනුම් දී ඇතැයි පොලිස් මුලස්ථාන ආරංචිමාර්ග සඳහන් කරයි.

පොලිස්පතිවරයා සම්බන්ධයෙන් විධිමත් හා පුළුල් පරීක්ෂණයක් පවත්වන ලෙස රහස් පොලිසියට දැනුම් දැනුම්දී ඇත්තේ ඉන් අනතුරුවය.