(අංජුල මහික වීරරත්න සහ සුජිත් හේවාජුලිගේ)

අධිරාජ්‍යවාදීන් අද ඔවුන්ගේ යටත් විජිත ප්‍රතිපත්තිය මැදපෙරදිග දී වඩා දියුණු සහ උපායශීලී ලෙසින් ක්‍රියාත්මක කරමින් සිටින බව සමගි ජනබලවේගයේ මන්ත්‍රී ඉමිතියාස් බාකීර් මාකර් මහතා පාර්ලිමේන්තුවේ දී අද (20)පැවසීය. 

පලස්තීන භූමිය යටත් විජිතයක් ලෙස  අත්විඳින ඛේදවාචකය හා සමාන තත්වයක් ලංකාව  සියවස් ගණනාවක් තිස්සේ පෘතුගීසී, ලන්දේසී මෙන්ම බ්‍රිතාන්‍ය අධිරාජ්‍යවාදීන් යටතේ අත්විඳි ආකාරය තම සිහියට නැගෙන බවද බාකීර් මාකර් මහතා කීය.

එදා ලාංකික  නිදහස වෙනුවෙන් විමුක්ති අරගල කරමින් නැගී සිටි වීර කැප්පෙට්ටිපොළ, පුරන්අප්පු, ගොංගාලේගොඩ බණ්ඩා, වාරියපොල හිමි, කුඩාපොල හිමි ඇතුළු විවිධ යුගවල නිදහස වෙනුවෙන් ජීවිත දුන් නිදහස් අරගලයේ වීරවරයන් තම මතකයට එන බවද බාකීර් මාකාර් මහතා සඳහන් කළේය.

එදා ඔවුන්ටත් ”ත්‍රස්තවාදී” හංවඩුව ගසමින් අධිරාජ්‍යවාදීන් ම්ලේච්ඡ මර්දනයක් ක්‍රියාත්මක කළ බව කී බාකීර් මාකර් මහතා ඒ ”ත්‍රස්තවාදී” යන විශේෂණ පදය මහත්මා ගාන්ධිගේත්, මන්ඩෙලාගේත්, යාසර් අරෆාත්ගේත් නම් වලට ඉදිරියෙන් යෙදීමට එදා යුගයේත් අධිරාජ්‍යවාදී බලවේග කටයුතු කළ බව කීය.

ඊශ්‍රායල, පලස්තීන යුද ගැටුමට සටන් විරාමයක් ප්‍රකාශයට පත්කරන්නැයි  ඉල්ලමින් පැවැති සභාව කල්තැබීමේ විවාදය අමතමින් හිටපු ජනාධිපතිවරයා මේ බව පැවසීය.