(ශ්‍රීනාත් ප්‍රසන්න ජයසූරිය)

මහජන ආරක්ෂක අමාත්‍ය ටිරාන් අලස් මහතාගේ පුතා පැදවූ මෝටර් රථය ගලගෙදර ප්‍රදේශයේදී සුදු ඉර කැපීම හේතුවෙන් ඔහුට රුපියල් 1,100 ක දඩ කොළයක් දී ඇති අතර ඔහු එම දඩ මුදල ගෙවා ඇතැයි පොලිසිය කියයි.

මුලින් දඩ කොලය ලියා සිටීමෙන් වැළකී සිටීම සඳහා ඇමති ඩිලාන් ටිරාන් අලස් මහතාගේ පුතා යම් මුදලක් ඉල්ලූ බව තියෙන බවට තොරතුරු වාර්තා වන නිසා  පරීක්ෂණයක් පවත්වන ලෙස මධ්‍යම පළාත් භාර ජ්‍යෙෂ්ඨ නියෝජ්‍ය පොලිස්පති නීතිඥ ලලිත් පතිනායක මහතා විසින් මධ්‍යම පළාත භාර නියෝජ්‍ය පොලිස්පති මහින්ද දිසානායක මහතාට උපදෙස් ලබා දී ඇත.

නියෝජ්‍ය පොලිස්පතිවරයා  ඒ අනුව මේ ගැන පුළුල් හා විධිමත් පරීක්ෂණයක් පැවැත්වීමට මහනුවර පොලිස් අධිකාරිනී ජානකී සෙනෙවිරත්න මහත්මිය පත් කර ඇත.

පොලිස් අධිකාරිනී සෙනෙවිරත්න මහත්මිය  ගලගෙදර පොලිසියට ගොස් මේ සම්බන්ධයෙන් පුළුල් විමර්ශනයක් ආරම්භ කර ඇති බව ආරංචි මාර්ග සඳහන් කරයි.

දඩ කොලය නොලියා යම් මුදලක් පොලිස් නිලධාරීන් දෙදෙනා ඉල්ලූ බව කියන අවස්ථාවේ ඇමතිවරයා ගේ පුතා තමා කවුදැයි හෙළි කර තමා වරදක් කර ඇති නිසා ඒ වෙනුවට දඩ කොලය ලබා දෙන ලෙස පොලිස් නිලධාරීන් දෙදෙනාට දැනුම්දීමක් කර ඇතැයිද පැවසේ.

ඇමතිවරයා ගේ පුතා වුවත් තමන් කළේ වරදක් නිසා තමන් දඩ දඩකොලය ගෙවා දැමීමට කිසිසේත් පසුබට නොවන බව කියාතිබෙන බවද පැවසේ.

පොලිස් නිලධාරීන් දෙදෙනා ඇමති පුතා ගෙන් එම දඩ කොළය දරුපියල් 1,100 මුදලක්ද ඉල්ලාගෙන පොලිස් යතුරු පැදියෙන් තැපැල් කාර්යාලයට ගොස් අදාල දඩ මුදල ගෙවා එහි එහි රිසිට් පත ද රැගෙන පැමිණ රියදුරු බලපත්‍රය සමග එම රිසිට් පත ඇමති පුතාගේ අතට පත්කර තිබේ.

අමාත්‍ය ටිරාන් අලස් මහතාගේ පුතාගේ මෙම ක්‍රියාව දැනගත් බොහෝ පොලිස් නිලධාරීන්ඔහුගේ නිහතමානීකම ගැන ප්‍රශංසාත්මක මුඛයෙන් කතා කර ඇතැයි ද දැන ගැනීමට ඇත.

සමහර ඇමැති පුතුන් පොලිසියට දැමූ පාට් ගැන හොඳ හැටි දන්නා පොලිස් නිලධාරින් ටිරාන් අලස් ඇමතිවරයා ගේ පුතා දඩ කොලය ලියන අවස්ථාවේ දී චණ්ඩි පාට් නොදමා කිසිදු කලබලයකින් තොරව අනන්‍යතාවය හෙළි නොකර දඩ කොලය ලබා ගැනීම ගැන පොලිස් නිලධාරීන් මවිතයට පත්ව ඇතැයිද කියති.

මේ සිද්ධිය දැනගත් බොහෝ පොලිස් නිලධාරීන් කියන්නේ වෙනත් දේශපාලනඥයකුගේ පුතකුට දඩ කොළයක් ලිව්වා නම් එම දඩ කොළය ලියූ පොලිස් නිලධාරීන්ට ස්ථාන මාරුවීමක් ලැබෙනු ඇතැයි කියාය.

පොලිසිය බාර ඇමැතිවරයා වන්නේ ද අමාත්‍ය ටිරාන් අලස් මහතාය.