පොල් මයිටාවාට ’’මාරයෙක්’’

(අංජුල මහික වීරරත්න)

දකුණු පළාතේ පොල් වගාවන් හි දරුණු ලෙස පැතිරී ගිය පොල් මයිටා  (Aceria guerreronis)  වසංගතය මැඩලීම සඳහා ලුණුවිල  පොල් පර්යේෂණායතනය විසින් හඳුන්වාදෙන ලද විලෝපිත මයිටාවා ඉතාමත් සාර්ථක වී ඇති බව එම පර්යේෂණායතනය සඳහන් කරයි.

මයිටා උවදුර නිසා පසුගිය කාලයේ දකුණේ පොල් අස්වැන්න සියයට 60කින් පමණ අවම විය.

මෙම පොල් මයිටාවාට ජෛව පාලන ක්‍රමෝපායක් වශයෙන්  ස්වාභාවික පරිසරයේ ම සිටින විලෝපිත මයිටාවෙක් වන Neoseiulus Barak නැමැති මයිටා විශේෂය යෙදීම මගින් පොල් මයිටා උවදුර සෑහෙන ප්‍රමාණයකට අවම කර ගැනීමට හැකි වී තිබෙන බව පොල් පර්යේෂණායතනය පවසයි.

මෙම විලෝපිත මයිටාවන් 5000ක් පමණ වරින් වර පොල් ගසේ ගෙඩි අතරට එක දිගට වසර දෙකක්වත් යෙදිය යුතු බවද පොල් පර්යේෂණායතනය සඳහන් කරයි.

පොල් මයිටා රෝගය සියයට සියයක්ම තුරන් කළ හැකි ක්‍රමයක් මෙතෙක් සොයා ගෙන නැති නමුත් මයිටා රෝගය නිසා පොල් ගෙඩි  කුඩා වීම සියයට 60කින් පමණ අවම කර ගැනීමට මෙම විලෝපිත මයිටාවා යොදා ගැනීම මගින් හැකිවී ඇතැයි තහවුරු කරගෙන තිබේ.