(අංජුල මහික වීරරත්න)

මත්ද්‍රව්‍ය භාවිතා කිරීම, ඇබ්බැහි වීම සහ මත්ද්‍රව්‍ය සම්බන්ධ  වැරදි වලට පරිවාසගත වූ දරුවන් පුනරුත්ථාපනය කිරීම සඳහා විශේෂ වැඩ පිළිවෙලක් ළඟදීම සකස් කරන බව කාන්තා සහ ළමා කටයුතු අමාත්‍ය සරෝජා සාවිත්‍රි පෝල්රාජ්  මහත්මිය කීවාය.

අනුරාධපුර දිස්ත්‍රික්කයේ කාන්තා සහ ළමා අනුකමිටුව කැඳවූ අවස්ථාවේදී  අමාත්‍යවරිය මේ බව කීවාය.

දිවයිනේ සෑම දිස්ත්‍රික්කයක්ම ආවරණය කරමින් කාන්තා සහ ළමා විෂය  ක්ෂේත්‍රයට අදාළ තොරතුරු, ගැටළු සාකච්ඡා කිරීම වෙනුවෙන් දිස්ත්‍රික් සම්බන්ධීකරණ කමිටු වලට සමගාමීව මෙම කාන්තා සහ ළමා අනුකමිටු පිහිටුවයි.

මෙම අනුකමිටුව කාන්තා සහ ළමා කටයුතු අමාත්‍යාංශයට අනුබද්ධිත ක්ශේත්‍ර නිලධාරීන් සහ දිස්ත්‍රික්කයේ දරුවන් වෙනුවෙන් මැදිහත් වන අධ්‍යාපන, සෞඛ්‍ය, ආරක්ෂාව පිළිබඳ වගකියනු ලබන ආයතන නිලධාරීන්ගේ සහභාගීත්වයෙන් පවත්වනු ලැබේ.

අනුරාධපුර දිස්ත්‍රික්කයේ කාන්තාවන් සහ ළමුන් පිළිබඳ විශේෂ සංඛ්‍යා දත්ත සහ තොරතුරු පිළිබඳ අමාත්‍යවරිය නිලධාරීන්ගෙන් විමසූ අතර එහිදී හඳුනාගත් අඩුපාඩු සහ දත්ත මදිකම් පිළිබඳව සැළකිලිමත් වන ලෙස අමාත්‍යවරිය සියලු නිලධාරීන්ට දැනුම් දුන්නාය.

දිස්ත්‍රික්කයේ  පවතින ක්ෂේත්‍ර  නිලධාරීන්ගේ පුරප්පාඩු පිළිබඳව සමාලෝචනය කෙරුණු අතර එම පුරප්පාඩු සපුරා ගැනීම වෙනුවෙන් අමාත්‍යාංශ මට්ටමෙන් මැදිහත් වන බව අමාත්‍යවරිය  වැඩිදුරටත් ප්‍රකාශ කළාය.

මීට අමතරව දැනට පරිවාස ගත කර සිටින දරුවන් අතුරින් වෘත්තීය අධ්‍යාපනයට යොමු කළ හැකි ළමුන් පිළිබඳ වාර්තාවක් සකස් කර රජයේ වෘත්තීය අධ්‍යාපන ආයතන සමඟ මනා සම්බන්ධීකරණයකින් යුතුව කටයුතු කරමින් එම දරුවන් නැවත සමාජගත වීමේ දී ස්වාධීන පුරවැසියන් බවට පත්කිරීමට කටයුතු කරන ලෙස උතුරු මැද පළාත් පරිවාස කොමසාරිස් වරියට දැනුම් දීමක්ද සිදු කෙරිණි.

මෙම අවස්ථාවට අනුරාධපුර දිස්ත්‍රික් පාර්ලිමේන්තු මන්ත්‍රී නිතීඥ භාග්‍ය හේරත්, අනුරාධපුර දිස්ත්‍රික් ලේකම් රංජිත් විමලසූරිය මහත්වරු ඇතුළු නිලධාරීහු සහභාගී වූහ.