(රංජිත් රාජපක්ෂ) 

ප්‍රධාන පක්ෂයක අත්පත්‍රිකාවක් භාර ගැනීම ප්‍රතික්ෂේප කළ ආධාරකරුවෙකුට නාවලපිටිය ආසන සංවිධායකවරයෙකු පහරදෙන අයුරු එම වෙලදසැලේ සවි කර තිබු ආරක්ෂිත කැමරාවේ සටහන් වී තිබුණි.

මෙම පහරදිම සිදුකර ඇත්තේ ඊයේ (15) උදැසන 11ට පමණය.

ආසන සංවිධායකවරයෙකු සහ ඔහුගේ ආධාරකරුවන් පිරිසක් සමඟ එම වෙලදසැල තුලට පැමිණ තරුණයාට අත්පත්‍රිකාවක් ලබා දී ඇති බවත් එම අවස්ථාවේ අත්පත්‍රිකාව ලබා ගැනීම තරුණයා ප්‍රතික්ෂේප කිරීම නිසා එයට උරණ වූ සංවිධායකවරයා තරුණයාට පහරක් එල්ල කර පසුව ඔහුගේ අතින් අල්ලා තර්ජනය කරන අයුරු ආරක්ෂිත කැමරාවේ සටහන් වී තිබුණි.

තරුණයාට පහරදීමෙන් පසු සංවිධායකවරයා සමඟ පැමිණි එම පක්ෂයේ ආධාරකරුවන් පිරිසක් මැතිවරණයෙන් “අපි උඹ ගැන බලා ගන්නම්” යනුවෙන් පවසමින් තරුණයා තර්ජනය කර ඇත.

පහරකෑමෙන් පසු එම තරුණයා නාවලපිටිය දිස්ත්‍රික් මහ රෝහල වෙත ඇතුලත් වී ප්‍රතිකාර ලබා එම රෝහලේ පොලිසිය වෙත ඔහුගේ මතු ආරක්ෂාව උදෙසා පැමිණිල්ලක් කර අද (16) රෝහලෙන් පිටව ගොස් ඇත.

පහරකෑමට ලක් වු තරුණයාගේ වෙලදසැල අද(16) වසා දමා තිබෙන අයුරු දක්නට ලැබුණි.