(නිමල කොඩිතුවක්කු)

ශ්‍රී ලංකාවේ බලශක්ති ක්ෂේත්‍රය සම්බන්දයෙන් නිව් ප්‍රෝටන් සමාගමට අදාළව ඇති කරගෙන ඇති ගිවිසුම රජයේ ගෞරවය හා මහජන විශ්වාසය රැකගැනීම සඳහා වහාම රටට හෙළිදරව් කළ යුතු බව සාධාරණ සමාජයක් සඳහා වන ජාතික ව්‍යාපාරයේ සභාපති කරු ජයසූරිය මහතා පැවසීය.

රටේ ප්‍රතිපත්තිමය තීන්දු තීරණ ගන්නා ඉහළම ආයතනය ලෙස හා මුදල් පාලනය භාරව සිටින ආයතනය වන පාර්ලිමේන්තුවට පවා එවැනි ගිවිසුමක් හෙළිදරව් නොකිරීම මගින් ජනතාව සතු පරමාධිපත්‍ය බලය බලවත් ලෙස හෑල්ලුකර ඇති බවත් ජයසූරිය මහතා නිවේදනයක් නිකුත් කරමින් සඳහන් කරයි.

 “ශ්‍රී ලංකා විදුලිබල මණ්ඩලයට අයත්, ආයතන ගණනාවක් ද ඇතුළු කෙලවරපිටිය බලාගාරය විදේශීය සමාගමකට අළෙවි කිරීමට අදාළව ඇති කරගෙන ඇතැයි කියන ගිවිසුම පිළිබඳව පාර්ලිමේන්තු මන්ත්‍රී අනුර කුමාර දිසානායක මහතා සිදු කරන ලද හෙළිදරව්ව පිළිබඳව ජනතාව අතර විශාල ආන්දෝලනයක් ඇතිව තිබේ.

කැබිනට් පත්‍රිකාව මගින් ඇමරිකාවේ නිව් ප්‍රෝටන් සමාගමට පැවරීම සඳහා යෝජනා කළ ද වාර්තා වී ඇති පරිදි ගිවිසුම අත්සන් කර ඇත්තේ ශ්‍රී ලංකා පවර් හෝල්ඩින්ග්ස් නමැති සමාගම මගිනි. මෙම සමාගම නිව් ප්‍රෝටන් සමාගමට සම්පූර්ණයෙන් අයිති සමාගමක්ද නැතහොත් හවුල් සමාගමක් ද යන්න දැන ගැනීමට ජනතාවට අයිතියක් ඇත.

ගිවිසුම 13 (1) වගන්තියේ සදහන් කර ඇති පරිදි  අවුරුදු දෙකක් යන තෙක් දෙපාර්ශවය අතර එකඟත්වයක් නොමැති ව රටට හෝ ජනතාවට ගිවිසුමේ සඳහන් විස්තර ප්‍රකාශයට පත් නොකිරීමට එකඟ වී තිබීම විශ්වාස කළ නොහැක.

 ප්‍රජාතන්ත්‍රවාදය රැකගැනීමට නිතරම හඬ නගන ”සාධාරණ සමාජයක් සඳහා වන ජාතික ව්‍යාපාරය” ලෙස අප ප්‍රජාතන්ත්‍රවාදී පාලනයන් තුළ මෙවැනි අස්වාභාවික ගිවිසුම් ගැන අසා නැත” යැයිද එහි සඳහන් වේ.