(සුජිත් හේවාජුලිගේ)

හිටපු මැති ඇමතිවරුන්ට රජයෙන් ලබා දී තිබූ බංගලා පහසුකම් සම්බන්ධයෙන් හිටපු ජනාධිපතිවරුන්ගේ සහ හිටපු මැති ඇමතිවරුන්ගේ වරප්‍රසාද පිළිබඳව කරුණු සොයා බැලීමේ ත්‍රිපුද්ගල කමිටුව  අධිකරණ රාජ්‍ය පරිපාලන ස්වදේශ  කටයුතු පළාත් සභා පළාත් පාලන සහ කම්කරු අමාත්‍යාංශයේ ප්‍රධානීන්ගෙන් පසුගියදා කරුණු විමසා ඇත.

අමාත්‍යාංශයේ නිලධාරීන් කිහිප දෙනෙකු කමිටුව හමුවට කැඳවා මෙසේ කරුණු විමසා ඇතැයි වාර්තාවේ.

රජයේ බංගලා ලබාදී තිබූ ඇමතිවරුන් සංඛ්‍යාව, හිටපු ඇමතිවරුන් තවමත්  රැඳී සිටින රජයේ බංගලා  සංඛ්‍යාව, එම නිවාස වලට ලබාදෙන පහසුකම් සහ  ඒවාට වැය කරන වියදම්  යනාදිය පිළිබඳව මෙලෙස කරුණු විමසා ඇත.

මේ අතර හිටපු ඇමතිවරුන්ගෙන් රජයේ බංගලා තවමත් බාරදී ඇත්තේ 14 දෙනකු පමණක් බව එම අමාත්‍යාංශ ආරංචි මාර්ග සඳහන් කළේය.

හිටපු ඇමතිවරුන්ට ලබා දී තිබු නිවාස සංඛ්‍යාව පනහකි.

බංගලා භාර නොදෙන හිටපු ඇමතිවරුන්ට ලබන 30  වැනිදායින් පසු  නඩු පැවරීමට අමාත්‍යාංශ ප්‍රධානීන් තීරණය කර ඇත.

හිටපු ජනාධිපතිවරුන්ගේ සහ  හිටපු මැති ඇමතිවරුන්ගේ වරප්‍රසාද සම්බන්ධයෙන් කරුණු සොයා බලා නිර්දේශ ඉදිරිපත් කිරීමට මෙම ත්‍රිපුද්ගල කමිටුව   පත් කරනු ලැබුවේ ජනාධිපති අනුර කුමාර දිසානායක මහතා විසිනි.

කමිටුව හිටපු ජනාධිපතිවරුන්ගෙන්ද  පසුගියදා ඔවුන්ගේ වරප්‍රසාද සම්බන්ධයෙන් කරුණු විමසීය.

හිටපු ජනාධිපතිවරුන්ගේ සහ හිටපු මැති ඇමතිවරුන්ගේ වරප්‍රසාද සම්බන්ධයෙන් කරුණු සොයා බලන කමිටුවේ සභාපතිවරයා ලෙස කටයුතු කරන්නේ විශ්‍රාමික  ශ්‍රේෂ්ඨාධිකරණ විනිසුරු කේ.ටී චිත්‍රසිරි මහතාය.

විශ්‍රාමික අමාත්‍යාංශ ලේකම් ඩී දිසානායක සහ විශ්‍රාමික දිස්ත්‍රික් ලේකම් ජයන්තා මුළුමුල්ල යන මහත්ම මහත්මීහු එහි සෙසු සාමාජිකයෝ වෙති.

මෙම කමිටුවේ විමර්ශන අවසන් වීමෙන් පසු හිටපු ජනාධිපතිවරුන්ගේ සහ හිටපු මැති ඇමතිවරුන්ගේ වරප්‍රසාද සම්බන්ධයෙන් නිර්දේශ  ඇතුළත් වාර්තාවක් රජයට බාර දීමට නියමිතය.