(සුජිත් හේවාජුලිගේ )

සීමාසහිත ලංකා ගොඩනැගිලි ද්‍රව්‍ය සංස්ථාවේ සභාපති  පොදු ව්‍යාපාර පිළිබඳ පාර්ලිමේන්තු කාරක සභාවට ( කෝප්  )කැඳවූ දිනට පෙර දින එම තනතුරෙන් ඉල්ලා අස්වී ඇති අතර  තමා  තනතුරෙන් ඉල්ලා අස්වූයේ කමිටුවට කැඳවූ නිසා දැයි එහි සභාපති මහාචාර්ය චරිත හේරත් මහතා  ඒ හිටපු සභාපතිවරයාගෙන් විමසා ඇත.

ඊට පිළිතුරු දී ඇති හිටපු සභාපති වරයා පවසා ඇත්තේ  තමා ඉල්ලා අස් වූයේ කෝප් කමිටුවට කැඳවූ නිසා නොවන බවයි.

ව්‍යාපාරිකයකු හෙයින්  කාර්යබහුල නිසා  එම තනතුරෙන් ඉල්ලා අස්වු බවද ඔහු සඳහන් කළේ‍ය.

පොදු ව්‍යාපාර පිළිබඳ පාර්ලිමේන්තු කාරක සභාව එහි සභාපති මහාචාර්ය චරිත හේරත් මහතාගේ ප්‍රධානත්වයෙන් පාර්ලිමේන්තුව පාර්ලිමේන්තු සංකීර්ණයේදී පසුගිය (21)වෙනිදා රැස්විය.

ගොඩනැගිලි ද්‍රව්‍ය සංස්ථාවේ කාර්ය සාධනය විමසීම සඳහා  මෙම සාකච්ඡාව කැඳවා තිබිණ.

පොදු ව්‍යාපාර පිළිබඳ පාර්ලිමේන්තු කාරක සභාව හමුවට ගොඩනැගිලි ද්‍රව්‍ය සංස්ථාව සංස්ථාවේ ප්‍රධානීන් පසුගිය 19 වැනිදාද  කැඳවනු ලැබ තිබුණද එහි  සභාපතිවරයා  එම රැස්වීමට සහභාගි වූයේ නැත. මේ සම්බන්ධයෙන් කෝප් කමිටු සභාපතිවරයා කළ විමසුමකදී එම ප්‍රධානීන් පැවසුවේ කෝප් කමිටුවට කැඳ වූ දිනට පෙර දින සභාපතිවරයා ඉල්ලා අස් වූ බවයි.

එහිදී අදහස් දැක්වූ කෝප් කමිටු සභාපතිවරයා පැවසුවේ ඔහුගේ ඉවත් වීම තවමත් නිත්‍යානුකූල ආකාරයට සිදු වී නැති හෙයින් ඔහු කමිටුවට නැවත කැඳවීමට කටයුතු කරන බවයි.

සභාපතිවරයා කෝප් කමිටුව හමුවට පසුගිය  21 වෙනිදා  නැවත කැදවුණේ ඒ අනුවය.

මහජන මුදල් යටතේ පවතින ආයතනයක ඕනෑම  නිලධාරියකු  ඕනෑම අවස්ථාවක කෝප් කමිටුවට කැඳවීමට හැකියාව ඇති බවද කෝප් කමිටු සභාපතිවරයා කීවේය.