කිතුණු බැතිමත්හු නත්තල සමරති

මම ප්‍රවෘත්තියක දැක්කා ඇල්ලේ ගුණවංශ හාමුදුරුවෝ පාස්කු ප්‍රහාරයෙන් විපතට පත්වුණු දරුවන්ට නත්තල වෙනුවෙන් තෑගි බෙදා දෙන දර්ශනයක්. ඒක බොහොම හොඳ ආදර්ශයක්. පාස්කු ප්‍රහාරය සිංහල, බෞද්ධ හදවත් මහා කම්පාවකට සහ වේදනාවකට ලක්කළ විපතක්... කිතුණු පල්ලිවල දැනදැනම සිද්ධවෙන්න ඉඩදුන් මහා මිනිස් ඝාතනය ගැන මහා සංඝ රත්නය සහ සිංහල බෞද්ධයින් පහුගිය රජයට විශාල විරෝධයක් දැක්වූවා. ඇල්ලේ ගුණවංශ හාමුදුරුවෝ මම ඉතාම ගරුකරන, කැමතිම හාමුදුරු කෙනෙක්. කිසි බයක්, සැකක් නැතුව කෙලින් කතා කරනවා වගේම, යුක්තිය වෙනුවෙන් සටන් කරනවා වගේම, උතුරු නැගෙනහිරද ඇතුළුව ලංකාව පුරා විනාශයට පත් කළ සහ පත්වෙන බෞද්ධ සිද්ධස්ථාන, පුරාවස්තු රැක ගැනීම වෙනුවෙන් කතා කරනවා වගේම, බුදුරජාණන්වහන්සේ දේශනා කළ පරිදිම සියලු සතහට කරුණාව, දයාව, මෛත්‍රිය දක්වන ඒ පින්තූර දැක්කහම හිතට හරිම ප්‍රබෝධයක් ඇති වුණා. උතුරේ විපතක් වුණත්, දකුණේ විපතක් වුණත් සිංහලයන් එක විදිහටම කම්පාවෙනවා. දුක බෙදා ගන්නවා. උදව් කරනවා. සිංහල බෞද්ධයින් කියන්නේ හිත හොඳ, ඉතාම සංවේදී පිරිසක්. සටන් කරනකොට සටන් කරනවා වගේම, අනුන් වෙනුවෙන් හොඳ හිතත් දයාවත්, කරුණාවත් අඩුවක් නැතුව පෙන්වනවා.