(සුජිත් හේවාජුලිගේ සහ  අංජුල මහික වීරරත්න)

රාජ්‍ය ඖෂධ නීතිගත සංස්ථාවේ  වෛද්‍ය සැපයුම් කළමනාකරණය සඳහා රුපියල් කෝටි 65 කට ආසන්න මුදලක් වැයකර  ස්ථාපනය කරනු ලැබූ  පරිගණක පද්ධතිය එසේ ස්ථාපනය කළදා සිටම  අක්‍රිය තත්වයේ පවතින බව පොදු ව්‍යාපාර පිළිබඳ පාර්ලිමේන්තු කාරක සභාවේදී  ( කෝප් ) තොරතුරු අනාවරණය විය.

මෙම පරිගණක පද්ධතියේ  නඩත්තු කටයුතු සඳහාද මසකට රුපියල්  ලක්ෂ 50ක්  වැය කෙරෙන බව  එහිදී වැඩිදුරටත් හෙළිවී ඇත.

මේ තොරතුරු හෙළිවූයේ  රාජ්‍ය ඖෂධ නීතිගත සංස්ථාවේ කාර්ය සාධනය විමසීම සඳහා එම සංස්ථාවේ ප්‍රධානීන්  පොදු ව්‍යාපාර පිළිබඳ පාර්ලිමේන්තු කාරක සභාව හමුවට ඉකුත් 31  වෙනිදා කැඳවූ අවස්ථාවේදීය.

කාරක සභාව එහි සභාපති පාර්ලිමේන්තු මන්ත්‍රී මහාචාර්ය චරිත හේරත් මහතාගේ ප්‍රධානත්වයෙන් පාර්ලිමේන්තු  සංකීර්ණයේදී එදින රැස්විය.

මේ නිසා අඩු වියදමින් නව පරිගණක පද්ධතියක් සකස් කිරීමේ  කටයුතු මේවනවිට ආරම්භ කර ඇති බව  රාජ්‍ය ඖෂධ නීතිගත සංස්ථාවේ  නිලධාරීහු  පැවසූහ.

එහි කටයුතු  සියයට 80  ක් පමණ දැනටමත් අවසන්වී ඇතැයිද  සඳහන් ඔවුහු කළහ.

මෙහිදී අදහස් දැක් වූ රාජ්‍ය ඖෂධ නීතිගත සංස්ථාවේ සභාපතිවරයා පැවසුවේ සංස්ථාවට අවශ්‍ය පරිදි මෙම පද්ධතිය සකස් කිරීමට රුපියල් කෝටි 700ක් පමණ වැයවන බවයි.

තවද රටේ පවතින ඖෂධ අවශ්‍යතාව ගණනය කිරීමේ ක්‍රමවේදය පිළිබඳවද  මෙහිදී වැඩි අවධානය යොමුවිය.

මෙවැනි ක්‍රමවේදයක් වඩාත් නිවැරදිව පවත්වාගෙන  යෑමට කටයුතු කිරීමේ වැදගත්කමද කෝප් කමිටු සභාපතිවරයා මෙහිදී  පෙන්වා දුන්නේය.