(විමුක්ති එස් රුද්‍රිගු)

ශ්‍රී ලංකාවේ දකුණු ප්‍රදේශයට ත්‍රස්තවාදී ප්‍රහාරයක් එල්ල වීමේ අවදානමක් තිබෙන බැවින් ඇතැම් සංචාරක ස්ථානවලින් වහාම ඉවත්වන්න යැයි ඊශ්‍රායල ජාතිකයන්ට එරට ජාතික ආරක්ෂක කවුන්සිලය දැනුම් දීමක් කර ඇත.

මෙරට අරුගම්බේ ප්‍රදේශය, දකුණු සහ බටහිර පළාතේ වෙරළ තීරයන්හි සිටින ඊශ්‍රායල ජාතිකයන්ට එම ප්‍රදේශ වලින් ඉවත් වන ලෙස ඊශ්‍රායල ජාතික කවුන්සියලය මෙලෙස දැනුම් දී තිබේ. ත්‍රස්තවාදී ප්‍රහාරයක් එල්ල විය හැකි බවට විශ්වාසදායි තොරතුරු ලැබී තිබෙන බැවින් එම ප්‍රදේශ වලින් ඉවත්වන ලෙස ඊශ්‍රායල ජාතිකයන්ට දැනුම් දුන් බව එරට ජාතික ආරක්ෂක කවුන්සිලය ප්‍රකාශ කළේය.

එසේම ශ්‍රී ලංකාවේ අනෙක් ප්‍රදේශවල සිටින ඊශ්‍රායල ජාතිකයන්ට දැඩි සැලකිල්ලෙන් පසුවන ලෙසත් ජනතාව එක්රැස්වන ස්ථාන මගහැර සිටින ලෙසත් ඊශ්‍රායල ජාතික ආරක්ෂක කවුන්සිලය උපදෙස් ලබාදී ඇත. කෙසේ නමුත් ඊශ්‍රායල ජාතිකයන්ට එල්ල වී ඇති තර්ජනයේ ස්වභාවය පිළිබඳව වැඩිදුර තොරතුරු ඊශ්‍රායල ජාතික ආරක්ෂක කවුන්සිලය හෙළිකර නොමැත.

ඊශ්‍රායල ආරක්ෂක බල අධිකාරිය ශ්‍රී ලංකා බලධාරීන් සමග සම්බන්ධව සිටින බවත් මෙරට තත්වය පිළිබඳව අවධානයෙන් සිටින බවත් එරට ජාතික ආරක්ෂක කවුන්සිලය පැවැසුවේය.